शिरूर बायपास रस्त्यावरदोन जणांचा अपघाती मृत्यू

शिरूर शहराजवळून जाणाऱ्या पुणे-नगर राज्य महामार्गावर झालेल्या क्रुझर जीप आणि मोटारसायकलचा अपघातात मोटारसायकलवरील दोन जण ठार झाले. मृतात अहमदनगर जिल्ह्यातील एकाचा समावेश आहे.
याबाबत शिरूर पोलिसांनी दिलेल्या माहितीनुसार अपघातासंदर्भात सोमनाथ बाळासाहेब बर्डे (रा. निमोणे, ता. शिरूर, जि. पुणे) यांनी फिर्याद दिली आहे. १८ मे रोजी रात्री साडेअकराच्या सुमारास हा अपघात झाला. क्रुझर जीप पुण्याकडून नगरच्या दिशेने चालली होती. त्या वेळी भरधाव वेगात असलेल्या क्रुझरची रिलायन्स पेट्रोलपंपाजवळ मोटारसायकलशी धडक झाली. धडकेत मोटारसायकलवरील शंकर शेटिबा औटी (१९, रा. राळेगण थेरपाळ, ता. पारनेर, जि. अहमदनगर) व अक्षय बाळासाहेब बर्डे (१७, रा. निमोणे ता. शिरूर) हे दोघे जण जागीच मृत्युमुखी पडले. या अपघातानंतर काही काळ वाहतूक विस्कळित झाली होती. या अपघातानंतर जीप चालक अरविंद मोराळे (रा. वडजी, जि. उस्मानाबाद) याला अटक करण्यात आली आहे. अधिक तपास फौजदार बी. व्ही. पाटील करत आहेत.