म. टा. प्रतिनिधी, पुणे
शिवाजीराव भोसले सहकारी बँकेतील सुमारे ७३ कोटी पाच लाख रुपये ही रोख शिल्लक रक्कम कमी असल्याचे लेखापरीक्षकांच्या पडताळणीमध्ये आढळून आले आहे. या गैरव्यवहारास जबाबदार असणाऱ्यांविरुद्ध गुन्हा नोंदविण्याचे आदेश सहकार आयुक्तांनी 'टोरवी पेठे अँड कंपनी' या चार्टर्ड अकाउंट फर्मला दिले आहेत.
सहकार आयुक्त सतीश सोनी यांनी याबाबतचे आदेश दिले आहेत. या बँकेचे २०१८-१९ या वर्षाचे लेखापरीक्षण करण्यात आले. हे काम 'टोरवी पेठे अँड कंपनी' यांना देण्यात आले होते. त्यामध्ये रोख शिल्लक रक्कम ही सुमारे ७३ कोटी पाच लाख आठ हजार ७२३ रक्कम कमी असल्याचे निदर्शनास आहे. या आर्थिक गैरव्यवहारास जबाबदार असणाऱ्यांविरुद्ध पोलिस ठाण्यामध्ये गुन्हा नोंदविण्यात यावा; तसेच याबाबतची माहिती सहकार आयुक्त कार्यालयात सादर करण्याच्या सूचना सोनी यांनी दिल्या आहेत. या बँकेवर पुणे शहर जिल्हा उपनिबंधक एन. व्ही. आघाव यांची प्रशासक म्हणून नेमणूक करण्यात आली होती. त्यांच्याऐवजी सहकारी संस्थांचे उपनिबंधक मधुकांत गरड यांची नियुक्ती करण्यात आली आहे. सहकार आयुक्त सतीश सोनी यांनी गरड यांची नियुक्ती केली असून, त्यांनी या कार्यभार स्वीकारला आहे.