म. टा. प्रतिनिधी, पुणे
हर हर महादेव... जय भवानी, जय शिवराय... छत्रपती संभाजी महाराज की जय अशा विविध घोषणांचा जयघोष...गडाच्या पायऱ्यांवर घातलेल्या रांगोळी आणि फुलांच्या पायघड्यांवरून ढोल-ताशा आणि पारंपरिक वाद्यांच्या गजरात भगवे झेंडे घेऊन अनेक शिवभक्त शिवरायांना मानवंदना देण्यासाठी रविवारी सकाळी सिंहगडावर दाखल झाले.
विश्व हिंदू परिषद आणि बजरंग दलाच्या वतीने सिंहगडावर तिथीनुसार शिवराज्याभिषेक दिन आणि छत्रपती संभाजी महाराज जयंती दिन साजरा करण्यात आला. या वेळी आमदार भीमराव तापकीर, पश्चिम महाराष्ट्र सहमंत्री विवेक कुलकर्णी, पुणे महानगर मंत्री किशोर चव्हाण, डॉ. शीतल मालुसरे, अजित आपटे, शाहीर हेमंत मावळे, शाहीर श्रीकांत रेणके तसेच विविध नगरसेवक आणि पदाधिकारी उपस्थित होते.
अभिवादन सोहळ्याची सुरुवात राजाराम पुलाजवळील वीर बाजी पासलकर स्मारकापासून ते सिंहगड वाहनतळापर्यंत दुचाकी रॅलीने झाली. सिंहगडावर शिवाजी महाराजांची प्रतिमा असलेल्या पालखीचे ढोलताशा आणि शंखनादाच्या गजरात स्वागत करण्यात आले. तानाजी मालुसरे यांच्या वंशज डॉ. शीतल मालुसरे यांच्या हस्ते महाराजांच्या मूर्तीला अभिषेक करण्यात आला. शाहीर श्रीकांत रेणके यांनी शाहिरीतून शिवरायांना मानवंदना दिली. सिंहगडावरील मंदिरे आणि छत्रपती राजाराम महाराज यांच्या समाधीचे पूजन करण्यात आले.
साईनाथ कदम, समीर रूपदे, धनंजय गायकवाड, सचिन लोहोकरे, योगेश देशपांडे आदींनी कार्यक्रमाचे संयोजन केले.
…...
सिंहगडावर नरवीर तानाजी मालुसरे यांचे स्मारक आहे. मात्र, स्वराज्याची निर्मिती करणाऱ्या छत्रपती शिवाजी महाराजांची प्रतिमा गडावर नाही. त्यामुळे गडावर शिवरायांची मेघडंबरीसहित भव्य प्रतिमा बसविण्यात यावी.
- किशोर चव्हाण, विश्व हिंदू परिषद
'विविध गडांवर सोहळा व्हावा'
रायगडावर राज्याभिषेक सोहळ्यानंतर गर्दीमुळे घडलेल्या अपघातामध्ये एका युवकाला प्राण गमवावे लागले. त्यानंतर एकाच गडावर गर्दी होण्यापेक्षा विविध गडांवर राज्याभिषेक सोहळा साजरा व्हावा, असा विचार पुढे आला आहे. त्याचे दुर्गप्रेमींकडून स्वागत होते आहे. त्यामुळेच गडावर झालेल्या सोहळ्याला दुर्गप्रेमींची चांगली उपस्थित होती. या पार्श्वभूमीवर विविध गडकोटांवर हा सोहळा सुरू झाल्यास रायगडावर ताण येणार नाही.
...............