म. टा. प्रतिनिधी, पुणे
अल्पावधीत राज्यभरात प्रसार झालेल्या आणि प्रवाशांच्या पसंतीस उतरलेल्या शिवशाही बससेवेच्या ऑनलाइन तिकीट बुकिंगच्या गोंधळाचा प्रवाशांना फटका बसत आहे. तिकीट आरक्षित करताना ज्येष्ठ नागरिक, महिला व लहान मुले यांच्या सोयीने जागांची निवड केली जाते. प्रत्यक्षात मात्र त्यांनी निवडेला सीट क्रमांक अपेक्षेपेक्षा भलतीकडेच असल्याची धक्कादायक बाब बसमध्ये गेल्यावर समोर येते आहे. त्यामुळे नाइलाजास्तव प्रवाशांना गैरसोयीचा सामना करीत प्रवास करावा लागतो.
बसमध्ये मागे बसलेल्यांना रस्ता खराब असल्यास जास्त हादरे बसतात, अनेकदा प्रवाशांना त्यामुळे दुखापती झाल्याचे देखील पाहायला मिळाले आहे. त्यामुळे वयोवृद्ध महिला, गरोदर महिला, लहान मुलांसह प्रवास करणारे प्रवासी हे प्रामुख्याने बसमध्ये पुढील बाजूस बसण्यास प्राधान्य देतात. पूर्वी सोयीची जागा पकडण्यासाठी एसटी स्टँडवर कसरत करावी लागत होती. आता ऑनलाइ तिकीट आरक्षित करताना जागा निवडीचा पर्याय उपलब्ध आहे. त्यामुळे अनेक जण तिकीट आरक्षणाला प्राधान्य देतात. त्यामध्ये पुढील बाजूची जागा, विंडो सीटची निवड केली जाते. मात्र, शिवशाहीच्या ऑनलाइन तिकीट आरक्षणाच्या प्रणालीत तांत्रिक गोंधळ होत असल्याचा गेल्या काही दिवसातील अनुभव आहे. प्रवाशाने आरक्षित केलेले तिकीट दुसऱ्याच ठिकाणी असल्याचे प्रत्यक्ष प्रवासादरम्यान निदर्शनास येते. त्यामुळे ऐच्छिक जागा मिळविण्यावरून प्रवासी व एसटी कर्मचाऱ्यांत वाद होत आहेत.
नाशिकहून पुण्याला शिवशाही बसने येणाऱ्या एका नोकरदार तरुणाने उजव्या बाजूचे सीट आरक्षित केले होते. मात्र, प्रवासावेळी त्यांनी आरक्षित केलेल्या क्रमांकाचे सीट बसच्या डाव्या बाजूस होते. त्यांनी शिवशाही बसच्या ड्रायव्हरकडे या बाबत विचारणा केली असता, 'त्यावर, मी आता काहीच करू शकत नाही,' असे उत्तर दिले. तसेच, स्वारगेट येथून पणजीला जाणाऱ्या वीणा ठाकूर ज्येष्ठ नागरिक महिलेने जाणीवपूर्वक पुढील बाजूचे (ड्रायव्हर सीटच्या मागील) सीट आरक्षित केले होते. मात्र, प्रवासाच्या दिवशी त्यांनी आरक्षित केलेल्या क्रमांकाचे सीट बसमध्ये सर्वात मागील बाजूस असल्याचे दिसून आले. त्यामुळे त्यांची मोठी गैरसोय झाली. पणजीचा प्रवास लांब अंतराचा आहे. मागील सीट त्यांना सोयीचे नव्हते. त्यांनी ते सीट बदलून मिळण्याची विनंती केली. मात्र, त्यास कोणी दाद दिली नाही.
'बुकिंग यंत्रणेत बदल करा'
एसटीच्या हिरकणी, शिवनेरी, अश्वमेध, शिवशाही, शिवशाही स्लिपर व साधारण बसचे तिकीट ऑनलाइन आरक्षित करता येते. यामध्ये प्रत्येक गाडाची आसन व्यवस्था व आसन क्षमता भिन्न आहे. काही 'टू बाय टू' गाड्यांमध्ये ४४; तर काही गाड्यांमध्ये ४५ सीट आहेत. मात्र, ४४ आसन क्षमता असलेल्या गाड्यांचे ऑनलाइन तिकीट आरक्षित करताना ४५ क्रमांकाचे सीट उपलब्ध दाखविले जाते. प्रत्यक्षात बसमध्ये त्या क्रमांकाचे सीट नसतेच. त्यामुळे प्रवाशांची मोठी गैरसोय होते. याचप्रमाणे शिवशाही बसमध्येही घोळ होत आहेत. त्यामुळे तिकीट बुकिंगच्या यंत्रणेत तांत्रिक बदल करण्याची आवश्यकता आहे.