म. टा. प्रतिनिधी, पुणे
दसरा, दिवाळी या सणांची चाहूल लागल्याने उत्सवी वातावरणाला सुरुवात झाली आहे. दसरा व दिवाळी या सणांसाठी खरेदीलाही सुरुवात झाली आहे. मयूर इव्हेंटस आणि मल्हार फिल्मस अँड एन्टरटेन्मेंटस या संस्थांनी एकाच छताखाली विविध वस्तूंची खरेदी करण्याची संधी उपलब्ध करून दिली आहे. विशेष म्हणजे खरेदी महोत्सवाबरोबरच खाद्य महोत्सव आयोजिण्यात आल्याने खरेदीचा आनंद लुटताना खाद्यपदार्थांचाही आस्वाद घेता येणार आहे.
शुभारंभ लॉन येथे १२ ते १४ ऑॅक्टोबर दरम्यान 'पुणेरी खाऊगल्ली आणि दिवाळी शॉपिंग फेस्टिव्हल'चे आयोजन करण्यात आले आहे. 'महाराष्ट्र टाइम्स' या महोत्सवाचा माध्यम प्रायोजक आहे. तीन दिवसीय महोत्सवांतून खरेदीचा आणि विविध पदार्थ चाखण्याचा आनंद नागरिकांना मिळणार आहे.
दिवाळीनिमित्त कपडे, दागिने, सुगंधी उटणे, दिवे, सजावटीसाठी साहित्य अशा विविध वस्तूंची खरेदी करता येणार आहे. विविध ब्रँडच्या वस्तू येथे उपलब्ध असतील. या खरेदीबरोबर महाराष्ट्राच्या पारंपरिक खाद्य पदार्थांची दालने विविध भागांची खाद्ययात्रा घडवतील. शेंगोळे, मासवडी, पिठले भाकरी, खान्देशी वांग्याचे भरीत अशा अनेक पदार्थांवर ताव मारता येईल. महोत्सवाला प्रवेश शुल्क आहे.
या महोत्सवामध्ये पुण्यातील अनेक मराठी व्यावसायिक तसेच महिला उद्योजक सहभागी होणार आहेत. व्यवसाय वृद्धिंगत व्हावा, यासाठी व्यासपीठ देण्याचा हा प्रयत्न आहे. तरुणांनी व्यवसाय क्षेत्राकडे वळावे, अशी जागृतीही महोत्सवाच्या निमित्ताने करण्यात येणार आहे.
--------------
'दांडिया नाइट' आणि 'अशी ही बनवाबनवी'
'महाराष्ट्र टाइम्स'तर्फे 'दांडिया नाइट'चे आयोजन करण्यात आले आहे. १३ आणि १४ ऑक्टोबर रोजी सायंकाळी ७ पासून दांडिया रंगणार आहे. दांडियामध्ये सहभागी व्यक्तींना नृत्याचा तसेच खाऊगल्लीचा आनंद घेता येणार आहे. महोत्सवादरम्यान एक खास चित्रपट रसिकांना अनुभवता येणार आहे आणि तो म्हणजे 'अशी ही बनवाबनवी'. मराठी रसिकांच्या मनावर अधिराज्य गाजविणाऱ्या आणि रसिकांना खळखळून हसवून आनंद देणाऱ्या या चित्रपटास ३० वर्षे पूर्ण झाली आहेत. यानिमित्त १२ ऑक्टोबर रोजी सायंकाळी ७ वाजता हा चित्रपट दाखवला जाणार आहे. चित्रपटासाठी सर्वांना मुक्त प्रवेश असेल.
--------------
'मटा कल्चर क्लब' सदस्यांना सवलत
शॉपिंग फेस्टिव्हल आणि खाऊगल्लीसाठी प्रवेश शुल्क आहे, मात्र 'महाराष्ट्र टाइम्स कल्चर क्लब'च्या सदस्यांना मोफत प्रवेश मिळेल. तसेच 'दांडिया नाइट'लाही प्रवेश शुल्क असून 'कल्चर कल्ब' सदस्यांना शुल्कात २५ टक्के सवलत मिळणार आहे.