म. टा. प्रतिनिधी, पिंपरी
'माघ शुद्ध दशमीनिमित्त संत तुकाराम महाराज यांचे चिंतनस्थळ असणाऱ्या श्री श्रेत्र भंडारा डोंगरावर ३० जानेवारी ते आठ फेब्रुवारीपर्यंत धार्मिक सोहळ्याचे आयोजन करण्यात आले आहे. या अंतर्गत गाथा पारायण, कीर्तन, प्रवचन, भारूड आणि अभंगवाणी आदी कार्यक्रम होतील,' अशी माहिती श्री विठ्ठल-रखुमाई तुकाराम महाराज भंडारा डोंगर ट्रस्टचे प्रमुख बाळासाहेब काशिद-पाटील यांनी दिली.
मावळ तालुक्यातील भंडारा डोंगरावर दर वर्षी माघ शुद्ध दशमीमिमित्त धार्मिक सोहळा साजरा होतो. त्यामध्ये राज्याच्या कानाकोपऱ्यातून भाविक सहभागी होतात. पहाटे काकडा, गाथा पारायण, प्रवचन, हरीपाठ, कीर्तन आणि जागर असे सप्ताहाच्या कालावधीतील दैनंदिन कार्यक्रमांचे स्वरूप असते. यंदा संत साहित्याचे अभ्यासक पुंडलिक महाराज जंगले यांचे 'संत तुकाराम महाराज जीवन कथा' या विषयावर निरूपण होणार आहे. पारायणाचे नेतृत्व कीर्तनकार नाना महाराज तावरे करणार आहेत. डॉ. रामचंद्र देखणे, उमेश दशरथे, जगन्नाथ पाटील, संजय धोंडगे, विश्वनाथ वाडेकर, रामभाऊ राऊत, पुंडलिक जंगले आणि सुदाम पाणेगावकर यांची कीर्तनसेवा होणार आहे. 'सोहळ्याच्या निमित्ताने संतवाणी आणि लोकसंगीताचा कार्यक्रम होणार आहे.
माघ शुद्ध दशमीला दुपारी बारा वाजता पं. रघुनाथ खंडाळकर, शुभम खंडाळकर, सुरंजन खंडाळकर यांची संतवाणी सादर होणार आहे. दुपारी बालाजी शिरसाठ यांचा भारूडाचा कार्यक्रम होईल,' असे काशिद-पाटील यांनी सांगितले.