दारूबंदीच्या ठरावाकडे दुर्लक्ष करणाऱ्याचा व्यवसाय उद्धवस्त
नांदेड : उमरी तालुक्यातील तळेगाव येथे महिलांनी रुद्रावतार धारण करत अवैध दारू विक्री करणाऱ्यांच्या घरावर हल्ला केला. दारू विक्री करणाऱ्याला चांगलाच चोप दिला. हा प्रकार जवळपास तासभर चालला होता. त्यानंतर संतप्त महिलांनी पोलिस ठाण्यात तक्रार केली.
तळेगाव उमरी तालुक्यातील सर्वात मोठी लोकसंख्या असलेले गाव आहे. गावात गेल्या अनेक दिवसांपासून अवैध दारू विक्री होते. दारूबंदी करावी यासाठी ग्रामपंचायत कार्यालयाने चक्क पाच वेळा ग्रामसभा घेतली. त्यासोबतच दारूबंदीचा ठरावही घेतला. हा ठराव पोलिसांना देण्यात आल्यानंतर गावकऱ्यांनी केलेल्या तक्रारीची प्रत देण्यात आली. परंतु, त्याचा फारसा उपयोग झाला नाही.
अवैध दारू विक्रीचा व्यवसाय गावाच्या मध्यवर्ती भागात चालतो. त्यामुळे परिसरातील महिलांचा मोठ्या अडचणीला सामोरे जावे लागत असून वेळोवेळी महिलांची छेड काढणे, अश्लील शिवीगाळ करणे, आरडाओरडा करणे आदी प्रकार राजरोसपणे सुरू झाले आहेत. पोलिस ठाण्यात तक्रारी देऊनही काहीच उपयोग होत नसल्याने संतप्त झालेल्या शेकडो महिला बुधवारी सकाळी दहा वाजता एकत्रित आल्या आणि चक्क दारू विक्री करणाऱ्याच्या घरात शिरल्या आणि बाहेर काढून चोप दिला.
अवैध दारू विक्री करणाऱ्यांचे मनोबल वाढत चालल्याचे लक्षात आल्यानंतर बुधवारी त्यांनी कायदा हातात घेतला. भर वस्तीत चालणाऱ्या दारूच्या अवैध व्यवसायाला राजकीय पाठबळ असल्याने पोलिस कारवाई करण्यास टाळाटाळ करीत होते. महिलांनीच पुढाकार घेऊन मोठे धाडस दाखवत हा व्यवसाय उद्धवस्त केला.