म. टा. प्रतिनिधी, पुणे
शहरातील नरवीर तानाजी मालुसरे रस्त्यावर (सिंहगड रोड) होणारी वाहतूक कोंडी फोडण्यासाठी महापालिकेतर्फे कॅनॉलशेजारून विकसित केल्या जाणाऱ्या पर्यायी रस्त्याचे ७० टक्के काम पूर्ण झाले असून, येत्या वर्षाअखेरपर्यंत हा मार्ग वाहनांसाठी खुला करण्यात येण्याची शक्यता आहे.
सिंहगड रस्ता आणि परिसरामध्ये लोकसंख्या मोठ्या प्रमाणात वाढल्याने या रस्त्यावरील वाहतुकीचा ताण दिवसेंदिवस वाढतच चालला होता. त्यामुळे कॅनॉललगतच्या मोकळ्या जागेवरून साडेसात मीटरचा रस्ता विकसित करण्याचा निर्णय महापालिकेने घेतला. गेल्या दीड वर्षापासून या रस्त्याचे काम सुरू असून, पहिल्या टप्प्यात विश्रांतीनगर ते फनटाइम मल्टिप्लेक्सपर्यंतचा रस्ता विकसित केला जात आहे. स्थानिक नगरसेविका मंजूषा नागपुरे, पालिकेचे पथविभागप्रमुख अनिरुद्ध पावसकर, कार्यकारी अभियंता अभिजित डोंबे यांनी नुकतीच या रस्त्याची पाहणी केली. त्या वेळी या रस्त्याचे ७० टक्के काम पूर्ण झाल्याचा दावा पालिकेच्या अधिकाऱ्यांनी केला. येत्या महिन्याभरात उर्वरित कामे पूर्ण करून डिसेंबर अखेरपर्यंत हा रस्ता वाहतुकीसाठी खुला केला जावा, अशी मागणी नागपुरे यांनी केली.
सिंहगड रस्त्याने जाणाऱ्या दुचाकी किंवा चारचाकी वाहनांसाठी हा रस्ता उपयुक्त ठरणार असून, कोणत्याही ट्रॅफिक सिग्नलला न थांबता वाहनचालकांना थेट वडगावपर्यंत जाता येणार आहे. या टप्प्यात काही ठिकाणी वाहतूक सुरू झाली असून, उर्वरित रस्ताही पूर्ण केला जाणार आहे. सिंहगड रस्त्यावरील प्रकाश इनामदार चौक (रांका ज्वेलर्ससमोर) ते विश्रांतीनगर या दरम्यानचे कामही युद्धपातळीवर पूर्ण केले जात आहे. त्यामुळे हा रस्ता खुला झाल्यानंतर वाहनचालकांना मोठा दिलासा मिळेल, अशी अपेक्षा नागपुरे यांनी व्यक्त केली.
...........