म. टा. प्रतिनिधी, पुणे एका तासाच्या आत विद्यापीठात जमा... असा विद्यार्थी संघटनांकडून दिला जाणारा एक संदेश सोशल मीडियावर फिरत असल्याचे ‘सोशल मीडिया लॅब’मध्ये लक्षात आले... तशी माहिती तत्काळ चतुःश्रृंगी पोलिस ठाण्याला मिळाल्यानंतर त्यांनी तेथे धाव घेऊन कायदा सुव्यस्थेची पाहणी केली. ... पुण्यासह राज्यातील कायदा सुव्यस्थेवर लक्ष ठेवण्यासाठी पुणे पोलिसांनी आतापर्यंतची सर्वाधिक अद्यावत अशी सोशल मीडिया लॅब सरू केली आहे. या लॅबच्या ‘ट्रायल रन’ दरम्यान घडलेली एक घटना उद्घाटनानंतर सांगण्यात आली. विद्यार्थी संघटनेकडून सोशल मीडियावर पसरवण्यात आलेल्या एका मेसेजची दखल घेऊन तत्काळ त्याची माहिती स्थानिकांना पोलिसांना देण्यात आल्याचे या वेळी सांगण्यात आले. या लॅबचे औपचारिक उद्घाटन पोलिस आयुक्त के. के. पाठक, अप्पर आयुक्त सी. एच. वाकडे, उपायुक्त दीपक साकोरे, पी. आर. पाटील, सायबर सेलचे वरिष्ठ पोलिस निरीक्षक सुनील पवार आणि ‘आयक्यूएसएस’चे हेरॉल्ड डिकोस्टा यांच्या उपस्थितीत मंगळवारी दुपारी झाले. सोशल मीडियावरील उमटणाऱ्या पडसादांचे विश्लेषण करून त्याचा कायदा सुव्यस्था अबाधित राखण्यासाठी या लॅबचा उपयोग होणार आहे. या लॅबमध्ये २४x७ प्रत्येकी सहा असे अठरा पोलिस कर्मचारी आणि एक अधिकारी काम करणार आहेत. फेसबुक, ट्विटर, यू-ट्यूब यासारख्या अनेक सोशल नेटवर्किंग साइटस् या लॅबमध्ये तपासण्यात येतात. आक्षेपार्ह अशा अनेक ‘कीज्’ तयार करण्यात आल्या आहेत. हे फिल्टर या साइटस् वर बसवण्यात आले आहेत. त्याआधारे कुठलेही आक्षेपार्ह मेसेज पोलिसांच्या नजरेत येतात आणि त्यावर योग्य ती कारवाई केली जाते. ‘मुंबई पोलिसांच्या धर्तीवरच छोटी; पण चांगली लॅब बनविण्यात आली आहे. याचा पुणे शहर व जिल्ह्याला चांगला फायदा होणार आहे. या लॅबमुळे कायदा सुव्यवस्था, दहशतवादी कारवायांसारखे गंभीर प्रकार रोखण्यास मदत होणार आहे. ही लॅब पुण्यासाठी पुणे पोलिसांसाठी एक मोठी ‘अॅसेट’ आहे’, असे मनोगत अप्पर आयुक्त सी. एच. वाकडे यांनी व्यक्त केले. ही लॅब पोलिस नियंत्रण कक्षाच्या धर्तीप्रमाणेच काम करेल. लॅबमध्ये काम करण्यासाठी नव्याने भरती झालेल्या १९ तरुण पोलिसांची निवड करण्यात आली आहे. त्यांना प्रशिक्षण देण्यात आले आहेत. आमच्यासाठीही हे एक प्रकारचे हे शिक्षणच आहे. मात्र, या लॅबचा उपयोग पुण्यातील कायदा सुव्यस्थेसाठी मोठ्या प्रमाणात होईल, असे पोलिस आयुक्त पाठक म्हणाले.
६६ यूआरएल डिलिट केल्या पुणे पोलिसांनी या लॅबच्या माध्यमातून आक्षेपार्ह अशा ६६ यूआरएल डिलिट केल्या आहेत, अशी माहिती उपायुक्त साकोरे यांनी दिली. एखादा आक्षेपार्ह मजकूर सापडल्यानंतर तो लगेचच डिलिट करण्यासाठी कार्यवाही केली जाते. पुढील सहा ते बारा तासांत या यूआरएल डिलिट करण्यात येतात. हा कालावधी आणखी कमी करण्यासाठी प्रयत्न सुरू आहेत, असे साकोरे म्हणाले.
६६ यूआरएल डिलिट केल्या पुणे पोलिसांनी या लॅबच्या माध्यमातून आक्षेपार्ह अशा ६६ यूआरएल डिलिट केल्या आहेत, अशी माहिती उपायुक्त साकोरे यांनी दिली. एखादा आक्षेपार्ह मजकूर सापडल्यानंतर तो लगेचच डिलिट करण्यासाठी कार्यवाही केली जाते. पुढील सहा ते बारा तासांत या यूआरएल डिलिट करण्यात येतात. हा कालावधी आणखी कमी करण्यासाठी प्रयत्न सुरू आहेत, असे साकोरे म्हणाले.