मटा सोसायटी
म. टा. प्रतिनिधी, पुणे
सहकारी गृहनिर्माण संस्थांच्या कामकाजाच्या स्मार्ट व्यवस्थापनासह सर्व सभासदांची सुरक्षितता आणि त्यांच्यासाठी विविध सुविधा उपलब्ध करून देण्यासाठी 'सोसायटी नाऊ' हे 'मोबाइल अॅप' विकसित करण्यात आले आहे. येत्या १५ फेब्रुवारीपर्यंत नोंदणी करणाऱ्या गृहनिर्माण संस्थांसाठी हे अॅप एक वर्षासाठी विनामूल्य उपलब्ध करून दिले जाणार आहे.
'टी सिक्स सोल्यूशन कंपनी'चे व्यवस्थापकीय संचालक तुषार झंवर आणि सहसंस्थापक कुणाल ओसवाल यांनी मंगळवारी पत्रकार परिषदेत या अॅपविषयीची माहिती दिली. पुणे महापालिका आणि पुणे जिल्हा सहकारी गृहनिर्माण महासंघातर्फे येत्या २५ व २६ जानेवारीला आयोजित प्रदर्शनात अॅपसाठी नोंदणी करता येणार आहे. एक वर्षानंतर हे अॅप वापरण्यासाठी प्रति सोसायटी पाचशे ते हजार रुपये शुल्क आकारण्यात येणार असल्याचे झंवर यांनी सांगितले.
गृहनिर्माण संस्थांच्या सुरक्षा व्यवस्थेचे सक्षमीकरण, संस्थांचे दैनंदिन कामकाज, सभासदांशी सुसंवाद, डिजिटल सूचना फलक, देखभाल शुल्कासह विविध देयके अदा करण्याची सुविधा, अशा विविध सेवांचे एकत्रीकरण अॅपमध्ये करण्यात आले आहे. या अॅपच्या माध्यमातून आजूबाजूच्या परिसरात असघंटित क्षेत्रात काम करणाऱ्यांची माहिती संकलित करण्यात आली असून, तातडीच्या वेळी सभासदांना त्यांच्या सेवेचा फायदा घेता येणार असल्याचा दावा त्यांनी केला.
शहर आणि जिल्ह्यातील किमान पन्नास टक्क्यांहून अधिक गृहनिर्माण संस्थांपर्यंत अॅप पोहोचविण्यासाठी प्रयत्न करण्यात येणार असल्याचे राहुल लिमये यांनी सांगितले. गणेश कला क्रीडा येथे होणाऱ्या प्रदर्शनात सहभागी होऊन नोंदणी करू न शकणाऱ्या गृहनिर्माण संस्थांसाठी १५ फेब्रुवारीपर्यंत नोंदणी सुरू राहणार आहे. या संदर्भात अधिक माहितीसाठी ९७६७६६९६६९ या क्रमांकावर संपर्क साधण्याचे आवाहन करण्यात आले आहे.