'करोना' मुळे निर्माण झालेल्या अभूतपूर्व परिस्थितीत अहोरात्र सेवा देऊन आपले कर्तव्य बजाविणाऱ्या अत्यावश्यक सेवांमधील सर्व कर्मचाऱ्यांना पुणेकरांनीही 'सलाम' केला. 'जनता कर्फ्यू'दरम्यान सायंकाळी बरोबर पाच वाजता आपल्या घराच्या खिडकीत, गॅलरीत येऊन, तर काही नागरिकांनी गच्चीवर जाऊन टाळ्या, शंख, थाळ्या आणि घंटा वाजवून या कर्मचाऱ्यांबद्दल कृतज्ञता व्यक्त केली. लहान मुलांपासून ज्येष्ठ नागरिक यात सहभागी झाले.
शहरातील मध्यवर्ती भागासह कोथरूड, कर्वेनगर, सिंहगड रस्ता, कात्रज, बिबवेवाडी, सहकारनगर येथील बहुतांश सोसायट्यांमधील नागरिक या उपक्रमात मोठ्या प्रमाणात सहभागी झाले. आपल्या घरातूनच 'गो करोना गो' अशा घोषणा देत कोणत्याही परिस्थितीत आम्ही 'करोना'वर मात करणारच, असा निर्धारदेखील नागरिकांकडून व्यक्त केला जात होता. आपत्कालीन परिस्थितीत आपल्या कर्तव्यात कसूर न करता महत्त्वाच्या सेवा पुरविणाऱ्या कर्मचाऱ्यांना अधिक जोमाने काम करण्यासाठी बळ देण्याचा प्रयत्नच यामधून दिसून येत होता.
अतिउत्साही तरुणाई
कृतज्ञता व्यक्त करतानाही काही अतिउत्साही नागरिकांनी थेट रस्त्यावर एकत्र येऊन फटाके वाजविण्यास सुरूवात केली, तर काही नागरिकांनी जोरदार घोषणाबाजी करून हुल्लडबाजी केली. शहरातील काही भागांत असे प्रकार घडल्याची माहिती मिळताच पोलिसांनी तातडीने धाव घेऊन धिंगाणा घालणाऱ्या नागरिकांना हुसकावून लावले. त्यानंतर रात्री उशिरापर्यंत पोलिसांची पथके 'पेट्रोलिंग' करत होती.
---