शहरात नालेसफाईची ६० टक्केच कामे पूर्ण

शहरात नालेसफाईची ६० टक्केच कामे पूर्ण

Prashant.Aher
@timesgroup.com
Tweet : @PrashantAherMT

पुणे : पावसाच्या आगमनाची चाहूल लागली असतानाच पालिका प्रशासनाकडून नालेसफाईच्या कामांना वेग आला आहे. नालेसफाईची कामे अंतिम टप्प्यात आली असल्याचा प्रशासनाचा दावा असला, तरी जेमतेम ६० टक्केच कामे झाली असून अर्थसंकल्पीय तरतूद उशिरा मिळाल्याने नालेसफाईच्या कामांमध्ये दिरंगाई झाली असल्याचे सांगण्यात येत आहे.
दरम्यान, प्रशासनाने कोथरूड, कात्रज, वडगाव शेरी, मार्केट यार्ड, धायरी आदी परिसरात कल्व्हटर्स बांधून पाणी रस्त्यांवर साचणार नाही, याचे नियोजन केले आहे. नाले तुंबल्याने सोसायट्यांमध्ये पाणी घुसण्याचे प्रकार घडणार नाहीत, यासाठी पालिका प्रशासनाने खबरदारीची पावले उचलली आहेत. मान्सूनच्या आगमनाला अवघे काही दिवस शिल्लक राहिले आहेत. महापौर मुक्ता टिळक यांनी नालेसफाईच्या कामांचा वारंवार आढावा घेऊन सद्यस्थितीची माहिती घेतली आहे.
नालेसफाईची कामे क्षेत्रीय कार्यालयांकडून सुरू आहेत. नालेसफाई आणि पावसाळी गटारे सफाईच्या घेण्यात आलेल्या आढाव्यांमध्ये ज्या ठिकाणी जास्त पाणी साठते, अशी १२५ ठिकाणे प्रशासनाने शोधली आहेत. गेल्या वर्षी पाणी साठणारी १५० ठिकाणे होती. यावर्षी ही ठिकाणे कमी झाल्याचा प्रशासनाचा दावा आहे. महापौर टिळक यांनी नालेसफाईच्या कामांत लक्ष घालून तातडीने दुरुस्तीची कामे करावीत, अशा सूचनाही खातेप्रमुखांना दिल्या आहेत. पालिका प्रशासनाने धोकादायक बांधकाम आणि ब्लू लाइनमधील घरांना नोटिसा दिल्या आहेत. चेंबरची दुरुस्ती, चुकीच्या पद्धतीने बसवलेले चेंबर खचून पडलेले खड्डे यांचीही दुरुस्ती करण्यासंदर्भात क्षेत्रीय आयुक्त आणि ज्युनियर इंजिनीयर यांच्याकडून कामे सुरू आहेत. नाल्यांमध्ये असलेला कचरा, गाळ आणि त्यावरील अतिक्रमण ही खरी सफाईपुढील
आव्हाने आहेत.
कर्वेनगर येथे नदीपात्रात मोठ्या प्रमाणात राडारोडा टाकण्यात येतो आहे. हा राडरोडा टाकण्यात आल्याने या ठिकाणी नदीपात्रातील पाण्याला त्याचा अडथळा होऊ शकतो. या प्रकरणी प्रशासनाने काही व्यक्तींना नोटिसाही बजावल्या आहेत. दरम्यान, कर्वेनगर येथील नालेसफाईची कामे ठेकेदारांना देण्यास उशीर झाल्याने कामे पूर्ण होण्यास आणखी काही कालावधी लागणार आहे. हडपसर परिसरातील नालेसफाईची कामे ५० ते ६० टक्के पूर्ण झाली असल्याचा दावा करण्यात येत आहे. या परिसरात नाल्यांवरील अतिक्रमण हा कळीचा मुद्दा बनला आहे.