१४ लाखांच्या २० दुचाकी जप्त
म. टा. प्रतिनिधी, पुणे
मौजमजा करण्यासाठी व मैत्रिणीला फिरविण्यासाठी शहराच्या विविध भागांतून स्पोर्ट्स बाइक चोरणाऱ्या दोघा जणांना फरासखाना पोलिसांनी अटक केली असून, दोघांकडून १४ लाख रुपये किमतीच्या चोरीच्या २० दुचाकी जप्त करण्यात आल्या आहेत.
संतोष विष्णू नागरे (वय २५, रा. गुरुदत्त कॉलनी, भेकराईनगर, मूळ रा. सिंदखेड) आणि सागर शरद समगीर (रा. वीर ता. पुरंदर जिल्हा, मूळ रा. बुलडाणा) अशी अटक केलेल्यांची नावे आहेत. शहरात दुचाकी चोरीचे प्रमाण मोठे आहे. फरासखाना पोलिस ठाण्याचे कर्मचारी शंकर कुंभार यांना माहिती मिळाली, की दुचाकीचोर नाना पेठेत येणार आहे. त्यानुसार वरिष्ठ निरीक्षक जगन्नाथ कळस्कर, उपनिरीक्षक प्रमोद हंबीर, बापू खुटवड, कुंभार, मयूर भोकरे, मोहन दळवी यांच्या पथकाने सापळा रचून त्यांना ताब्यात घेतले. त्यांच्याकडे चौकशी केल्यानंतर त्यांनी शहरातून दुचाकी चोरल्याची कबुली दिली. त्यांनी शहरातून तब्बल २० दुचाकी चोरल्याचे समोर आले आहे.
संतोष मूळचा सिंदखेडचा असून, गेल्या आठ वर्षांपासून पुण्यात राहतो; तर सागर पुरंदर तालुक्यातील वीर गावचा असून, त्याचे मोबाइलचे दुकान आहे. एका मित्रांद्वारे दोघांची ओळख झाली होती. त्यानंतर मौजमजेसाठी दोघांनी शहरातील विविध भागांतील महाविद्यालयासमोरील स्पोर्ट्स बाइक चोरण्यास त्याने सुरुवात केली. विशेषतः स्पोर्ट्स बाइकवर महाविद्यालयात जाणाऱ्या विद्यार्थ्यांना हेरून बनावट चावीने दुचाकीची चोरी करीत होते. त्यानंतर चोरलेल्या दुचाकी वीर गावातील सागरच्या मालकीच्या गोठ्यात लपवून ठेवल्या जात होत्या. दोघांनी मिळून फरासखाना आणि कोंढवा पोलिस ठाण्याच्या हद्दीतून प्रत्येकी एक स्पोर्ट्स बाईकची चोरी केली. तसेच, विमानतळ पसिरातून सहा, हडपसर चार आणि विश्रांतवाडी हद्दीतून तीन दुचाकींची चोरी केल्याचे समोर आले आहे.