'एसटी' आगारात; खासगी बस रस्यावर

पुणे : राज्य मार्ग परिवहन महामंडळाकडे (एसटी) कर्मचाऱ्यांच्या वेतनासाठी पैसे नसतानाही खासगी शिवशाही बसची सेवा सुरू करण्याचा निर्णय महामंडळाने घेतला आहे. एकीकडे अपेक्षेप्रमाणे प्रवासी, उत्पन्न मिळत नसल्याने एसटीच्या बऱ्याचशा बस आगारातच उभ्या आहेत. दुसरीकडे ठेकेदारांच्या बस सेवेत दाखल करून घेण्यात येणार असल्याने आर्थिक बोजा आणखी वाढणार आहे. त्यामुळे ठेकेदारांच्या बसद्वारे शिवशाही सेवा सुरू करण्याच्या महामंडळाच्या निर्णयावर कर्मचाऱ्यांमध्ये नाराजी आहे.

राज्यात १७ सप्टेंबरपासून एसटी महामंहळाची सेवा पूर्ण आसनक्षमतेने सुरू करण्यात आली आहे. दिवाळीनंतर प्रवासीसंख्येत वाढ झाली आहे. त्यानुसार एसटीच्या विभागांकडून टप्प्याटप्प्याने बस फेऱ्यांमध्ये वाढ करण्यात येत आहे. मात्र, अद्यापही लॉकडाउनपूर्वीप्रमाणे एसटीच्या बस मार्गावर आलेल्या नाहीत. लॉकडाउनपूर्वी एसटीच्या सोळा ते साडेसोळा हजार बस मार्गावर असत. त्याद्वारे दैनंदिन सरासरी ५६ ते ६० लाख प्रवासी प्रवास करत होते. त्यातून २२ ते २३ कोटी रुपये उत्पन्न मिळत होते. सद्यस्थितीत दहा ते साडेदहा हजार बस मार्गावर येत असून, प्रवासी संख्या केवळ २५ लाख आहे. उत्पन्नदेखील १० ते ११ कोटी ए‌वढेच मिळत आहे. त्यामुळे ठेकेदारांच्या बस मार्गावर आणण्याची खरेच गरज आहे का, ठेकेदारांच्या बस मार्गावर आल्यानंतर त्यांना करारानुसार निश्चित शुल्क द्यावे लागणार आहे. त्याचा भार महामंडळाला पेलता येणार आहे का, असा प्रश्न कामगारांकडून विचारला जात आहे.

महामंडळावर 'आर्थिक बोजा' एसटी महामंडळाने बस पुरवठादारांसोबत भाडेतत्त्वावर बस पुरविण्याचा करार केला आहे. या करारातील तरतुदीनुसार बस पुरवठादारास प्रतिदिन हमी दिलेल्या किलोमीटरसाठी भाडेशुल्क अदा करावे लागणार आहे. भाडेतत्त्वावरील सर्व शिवशाही बस एकत्रित सेवेत आणल्यास त्याचा आर्थिक बोजा महामंडळावर पडेल. त्यामुळे प्रथम टप्प्यात भाडेतत्त्वावरील ठेकेदारांच्या १० टक्के बस किंवा तीन बस यापैकी जास्त संख्या येईल, तेवढ्या बस सेवेत आणण्याला मंजुरी दिली आहे. त्यानुसार ठेकेदारांच्या ३१ बस मार्गावर आणण्याचा निर्णय झाला आहे.

'शिवनेरी' बस उभ्याच

ठेकेदारांच्या शिवशाही बसची सेवा सुरू करण्यात येणार आहे. दुसरीकडे महामंडळाच्या मालकीच्या पाच ते सहा शिवनेरी बस शंकरशेठ रस्त्यावरील एसटीच्या पुणे विभागीय कार्यालयात उभ्या आहेत. त्या बस सेवेबाहेर का, असा प्रश्न उपस्थित होत आहेत.

कर्मचारी संघटनेचा विरोध 'प्रवाशांची मागणी आणि पसंतीदेखील लालपरीलाच आहे. मात्र, अद्यापही पूर्णपणे सर्व बस मार्गावर (शेड्युल) नाहीत. प्रवासीसंख्या हळूहळू वाढत असताना खासगी गाड्या चालविण्याचा निर्णय चुकीचा आहे. या निर्णयाला महाराष्ट्र एसटी कामगार संघटनेचा विरोध आहे,' अशी माहिती संघटनेचे अध्यक्ष संदीप शिंदे यांनी दिली.