म. टा. प्रतिनिधी, पुणे
वेतन वाढीच्या मुद्द्यावरून राज्य मार्ग परिवहन महामंडळाच्या (एसटी) कर्मचाऱ्यांनी पुकारलेला संप दुसऱ्या दिवशी काटेकोरपणे पाळण्यात आल्याने प्रवाशांचे मोठ्या प्रमाणावर हाल झाले. पुण्याहून बाहेर गावी जाणाऱ्या प्रवाशांची धांदल उडाली, तसेच सुटीसाठी गावी गेलेल्यांना परतीच्या प्रवासासाठी वाहने न मिळाल्याने अडकून पडण्याची वेळ आली. पुणे विभागात शुक्रवारच्या तुलनेत शनिवारी अधिक बसफेऱ्या रद्द कराव्या लागल्याचे प्रशासनाने सांगितले. स्वारगेट, शिवाजीनगर आणि पुणे स्टेशन येथील आगारांमधील वाहतूक पूर्णपणे ठप्प होती. या तिन्ही आगारांसह विभागातील अन्य डेपोंमधून दरदिवशी सुमारे सहा हजार फेऱ्या होतात. त्यापैकी ९० टक्के फेऱ्या झाल्या नाहीत.
कर्मचाऱ्यांच्या संपामुळे एसटीची वाहतूक विस्कळित झाल्याने प्रवाशांना कसरत करण्याची वेळ आली आहे. खासगी वाहनांचा शोध घेऊन, बसमध्ये जागा मिळविणे आणि तिकिटाची रक्कम कमी करण्यासाठी घासाघीस करणे, आदीमुळे प्रवाशांना मनस्तापही सहन करावा लागत आहे. एसटी स्टँडवरून शिवशाही व शिवनेरी बसच्या माध्यमातून प्रवासी सेवा तुरळक प्रमाणात सुरू आहे. त्यामुळे अनेक प्रवासी स्टँडवर मोठ्या आशेने येत असून, त्यांचा हिरमोड होत आहे. स्वारगेट येथून दादर, बोरिवली, ठाणे या मार्गावरील शिवनेरी, सांगली, कोल्हापूर मार्गावरील शिवशाही बस शनिवारी सुरू होत्या. शिवाजीनगरहून दादर व औरंगाबादसाठी शिवनेरी बसच्या फेऱ्या करण्यात आल्या. मात्र, त्यांची संख्या कमी होती आणि त्या वेळापत्रकानुसार धावत नव्हत्या. स्वारगेट येथून बारामतीला दुपारपर्यंत शिवशाही बसची केवळ एकच फेरी करण्यात आली.
पुणे विभागात साधारणपणे शुक्रवारी मध्यरात्री १२ पासून शनिवारी सायंकाळी सहा वाजेपर्यंत १४२८ बस फेऱ्या होतात. त्यापैकी अवघ्या १३५ फेऱ्या झाल्या होत्या. शनिवार आणि रविवारी एसटी बसला गर्दी असते. त्यामुळे अनेक गाड्यांचे तिकीट आरक्षित करण्यात आले होते. त्यामुळे तिकीट आरक्षण केंद्राच्या येथे चौकशी करण्याकरिता प्रवाशांची सकाळपासूनच लांबलचक रांग लागली होती. दरम्यान, पूर्व कल्पना न देता गैरहजर राहिलेल्या कर्मचाऱ्यांवर पुणे विभागात अद्याप कारवाई करण्यात आलेली नसल्याचे प्रशासनाकडून सांगण्यात आले.
पुण्यात अडीच कोटींचे नुकसान
पुणे विभागात दररोज ९५४ बसद्वारे सहा हजार फेऱ्या केल्या जातात. मात्र, सलग दोन दिवस ९० टक्क्याहून अधिक फेऱ्या रद्द झाल्याने विभागाचे गेल्या दोन दिवसांत सुमारे अडीच कोटी रुपयांचे उत्पन्न बुडाले आहे. शिवाजीनगर आगाराला दररोज ३२ लाख रुपयांचे उत्पन्न मिळते. सुटीच्या दिवशी ते सुमारे ४० लाख रुपयांवर जाते. हे उत्पन्न बुडाले आहे.
..
पुणे विभागाचा आढावा
डेपो १३
उपलब्ध बस ९५४
दैनंदिन फेऱ्या ६ हजार
दैनंदिन प्रवासी ३ लाख
दैनंदिन उत्पन्न १ कोटी