म. टा. प्रतिनिधी, पुणे
बालकलाकारांना नाट्यक्षेत्रात व्यासपीठ देण्यासाठी महाराष्ट्र राज्य बालनाट्य स्पर्धेचे दरवर्षी आयोजन केले जाते. या स्पर्धेच्या पुण्यातील प्राथमिक फेरीला उद्या, मंगळवारपासून (७ जानेवारी) सुरुवात होत आहे. यामध्ये १० जानेवारीपर्यंत विविध नाटके पाहता येणार आहेत.
महाराष्ट्र सरकारच्या सांस्कृतिक कार्य संचालनायाच्या वतीने ही स्पर्धा घेण्यात येते. यंदाचे स्पर्धेचे १७वे वर्ष आहे. ६ ते १८ जानेवारी या कालावधीदरम्यान मुंबई, वाशी, पुणे, कोल्हापूर, औरंगाबाद, बीड, उस्मानाबाद, नांदेड, सोलापूर, नाशिक, जळगाव, नागपूर, अमरावती अशा ठिकाणी ही फेरी सुरू झाली आहे. या सगळ्या केंद्रामध्ये ३५२ नाट्यसंस्थांनी सहभाग घेतलाय. पुण्यात ७ तारखेपासून सुरू होणाऱ्या या स्पर्धेतील नाटके अण्णा भाऊ साठे नाट्यगृह, येरवडा येथे सकाळी १० वाजल्यापासून ही नाटके प्रेक्षकांना विनामूल्य पाहता येणार आहेत.
सात तारखेला 'गुड्डी' (आनंदवन एज्युकेशन सोसायटी), 'इमोशन एआय' (सिटीप्राइड स्कूल), 'हनुमान' (यशवंतराजे प्रतिष्ठान), 'माणूसघर' (थिएटर वर्कशॉप अॅकॅडमी), 'हाउ डेयर यू' (आकांक्षा बालरंगभूमी), 'एक था टायगर' (संक्रमण), 'खेळताड' (न्यू इंग्लिश स्कूल) या नाटकांचे प्रयोग होणार आहेत.
८ तारखेला 'पुन:श्च क्रांतिसूर्य' (सेवासदन इंग्लिश मीडियम स्कूल), 'निरोप' (ज्ञानप्रबोधिनी नवनगर विदायालय), 'इमारत आणि झोपडी' (एमएसएस हायस्कूल), 'चम चम चमको', 'असावा सुंदर चॉकलेटचा बंगला', 'चालीन तितक्या वाटा गं' आणि 'बळी' ही नाटके पाहण्याची संधी आहे. ९ तारखेला गुरुवारी 'स्वीट होम', 'असंच एके दिवशी', 'एक आहे जंगल', 'निबंध', 'गांधी व्हायचंय आम्हाला', 'देवा तुझा रंग कसा', 'वंदे मातरम्', 'तिसरे स्वातंत्र्य' ही नाटके सादर होणार आहेत. १० तारखेला शेवटच्या दिवशी, 'इन्व्हिजिबल एनिमी', 'पट्टेरी', 'खेळ मांडियेला', 'थेंबाचे टपाल' ही नाटके पाहता येतील.