पूर्वेकडील रिंग रोडला मान्यता

राज्य सरकारकडून अध्यादेश जारी

म. टा. प्रतिनिधी, पुणे

शहरातील वाहतुकीची कोंडी फोडण्यासाठी महाराष्ट्र राज्य रस्ते विकास महामंडळातर्फे (एमएसआरडीसी) दोन टप्प्यांत तयार करण्यात येणाऱ्या रिंग रोडच्या पूर्व भागाला मान्यता देणारा अध्यादेश राज्य सरकारने जारी केला आहे. या रस्त्याला ‘विशेष राज्यमार्गा’चा दर्जा देण्यात आला आहे. ‘एमएसआरडीसी’च हा रस्ता तयार करणार आहे. या कामासाठी पर्यावरण, वन विभागाच्या मान्यता; तसेच भूसंपादनाच्यादृष्टीने प्रशासकीय प्रक्रियेला सुरवात करण्यात आली आहे.
पुणे महानगर प्रदेश विकास प्राधिकरणानेही (पीएमआरडीए) रिंग रोड आखला आहे. मात्र, हा रिंग रोड दोन्ही पुणे आणि पिंपरी-चिंचवड शहरांच्या जवळून जाणारा आहे. ‘एमएसआरडीसी’चा रिंग रोड दोन्ही शहरांपासून दूर अंतरावर आहे. ‘एमएसआरडीसी’च्या रिंग रोडचा विकास आराखडा तयार करून अंमलबजावणीच्यादृष्टीने ‘एमएसआरडीसी’ने सुरवात केली आहे. ‘पीएमआरडीए’च्या रिंग रोडला नुकतीच मान्यता मिळाली आहे.
‘एमएसआरडीसी’कडून बनवण्यात येणारा रिंग रोड पुणे आणि पिंपरी चिंचवड या दोन्ही शहरांच्या बाहेरून जाणारा, १०० किलोमीटर लांबीचा आणि ११० मीटर रुंदीचा आहे. त्यामध्ये दोन टप्पे आहेत. उर्से ते खेडशिवापूर हा पूर्व भागाचा पहिला टप्पा असेल. पूर्व भागातील रिंग रोडबाबतचा अध्यादेश राज्य सरकारने काढला आहे. दुसऱ्या टप्प्यात खेड शिवापूरपासून कल्याण - मालखेड - मुठा - पौड येथील चाले आणि गोडांबेवाडी - पिंपळोली - चांदखेड - परंदवाडी येथून पुणे - मुंबई एक्स्प्रेस हायवेपर्यंतचा समावेश आहे. या रस्त्याच्या दोन टप्प्यांपैकी सुरुवातीला पूर्व भागाचे काम हाती घेण्यात येणार आहे. या मार्गामध्ये वन खात्याची जमीन आहे. त्यामुळे वन खात्याच्या परवानगीचा प्रस्ताव पाठवण्यात आला आहे. या रस्त्यासाठी पर्यावरण विभागाचीही परवानगी अत्यावश्यक आहे. त्या प्रक्रियेलाही सुरुवात करण्यात आली आहे. या प्रक्रिया पूर्ण झाल्यानंतर लगेचच भूसंपादन प्रक्रिया सुरू केली जाणार असल्याचे ‘एमएसआरडीसी’च्या वरिष्ठ अधिकाऱ्यांनी सांगितले.

पहिल्या टप्प्यातील रस्ता
- उर्से येथे पुणे मुंबई एक्स्प्रेस-वेजवळ रिंग रोडला सुरुवात होईल.
- उर्सेपासून मावळ तालुक्यामधील वडगावपासून-काटवी - आंबी - आकुर्डीपर्यंत.
- आकुर्डीनंतर राज्य मार्ग क्रमांक ५०वरील नानोली - यलवडी - देहू - निघोजे - मोई - कुरळी - ​चिंबळीपर्यंत.
- चिंबळी येथून पुणे नगर रस्स्त्यारील आळंदी-चिंचोली खुर्द - सोकी - गोळेगाव - भावडी - लोणीकंद
-लोणीकंद येथून जुना राष्ट्रीय महामार्ग क्रमांक नऊवरील बकोरी - वाडेबोल्हाई - भिवरीपर्यंत.
- भिवरी येथून सासवड रस्त्यावरील आळंदी म्हातोबाची - लोणीकाळभोर - वडकीपर्यंत.
-वडकी येथून होळकरवाडी - वडाची वाडी - आसकरवाडी - गोगलेवाडी - वेळू - शिवरे आणि राज्य महामार्ग क्रमांक चारजवळील खेड शिवापूरपर्यंत.