'महाराष्ट्रातही अँटी रोमियो स्क्वॉड हवं'

मटा ऑनलाइन वृत्त । पुणे

भाजप आमदाराच्या मुलीवर झालेल्या जीवघेण्या हल्ल्याची राज्य महिला आयोगानं गंभीर दखल घेतली आहे. रोड रोमियोंचा बंदोबस्त करण्यासाठी उत्तर प्रदेशच्या धर्तीवर महाराष्ट्रातही अँटी रोमियो स्क्वॉड असायला हवं. त्याबाबत मुख्यमंत्री देवेंद्र फडणवीस यांच्याशी चर्चा करणार असल्याचं राज्य महिला आयोगाच्या अध्यक्षा विजया राहटकर यांनी सांगितलं.

यवतमाळ जिल्ह्यातील वणीचे भाजप आमदार संजीवशेट्टी बोदकुरवार यांची मुलगी अश्विनी हिच्यावर पिंपरीत प्राणघातक हल्ला करण्यात आला असून त्यात तिची बोटं कापली गेली आहेत. या हल्ल्याप्रकरणी पोलिसांनी राजेश बक्षीला ताब्यात घेतलं आहे. या घटनेचं वृत्त कळल्यानंतर राहटकर यांनी आज सदर मुलीची भेट घेऊन चौकशी केली. त्यानंतर घेतलेल्या पत्रकार परिषदेत त्यांनी राज्यात अँटी रोमियो स्क्वॉडची गरज विशद केली. याबाबत मुख्यमंत्र्यांशी चर्चा करूनच निर्णय घेतला जाणार असल्याचंही त्या म्हणाल्या.

एप्रिल अखेरपर्यंत महिलांसाठी हेल्पलाईन

राज्य महिला आयोगाचे अॅप, संकेतस्थळ असून या सुविधा मर्यादित असल्याने एप्रिल अखेर पर्यंत महिलांच्या तक्रारी जाणून घेण्यासाठी राज्य महिला आयोगाची स्वतंत्र हेल्पलाइन आणि टोल फ्री नंबर प्रसिद्ध करणार असल्याचंही त्यांनी सांगितलं.

एकत्र कुटुंब पद्धतीचा अवलंब करा

महिलांनी कायद्याची माहिती करून घेतली पाहिजे. त्याच बरोबर समाज आणि पालकांनीही बदलत्या कल्चरला टाळून एकत्र कुटुंब पद्धतीचा अवलंब करावा आणि पाल्यांवर लक्ष ठेवायला हवं असा सल्लाही त्यांनी यावेळी दिला. यावेळी पालकमंत्री गिरीश बापटही उपस्थित होते.