म. टा. प्रतिनिधी, पुणे
पुणे मेट्रो प्रकल्पाच्या शिवाजीनगर धान्य गोदाम ते रामवाडी दरम्यानच्या स्टेशनच्या बांधकामाला येत्या दोन महिन्यांत सुरुवात होण्याची शक्यता आहे. या मार्गावरील सात स्टेशनसाठी चार कंपन्यांनी महाराष्ट्र मेट्रो रेल्वे कॉर्पोरेशनकडे (महामेट्रो) निविदा दाखल केल्या आहेत. या निविदांच्या तपासणी करून पात्र कंत्राटदाराची निवड झाल्यावर मेट्रोच्या दोन्ही मार्गांवरील सर्व स्टेशनचे काम सुरू होणार आहे.
महामेट्रोने गेल्या महिन्यात शिवाजीनगर ते रामवाडी दरम्यानच्या ७.७ किमीच्या कामासाठी पात्र कंत्राटदाराची निवड केली. या मार्गावर सध्या 'जिओ-टेक्निकल' सर्वेक्षण सुरू करण्यात आले आहे. या निविदांपाठोपाठ शिवाजीनगर ते रामवाडी मार्गावरील सात स्टेशनच्या बांधकामाची निविदांची मुदत नुकतीच संपली. स्टेशनच्या बांधकामासाठी दाखल झालेल्या चार निविदांची तांत्रिक आणि आर्थिक छाननी पूर्ण केली जाणार आहे. स्टेशनच्या बांधकामासाठी परदेशी वित्तीय कंपन्यांकडून अर्थसाह्य मिळणार असल्याने निविदांची छाननी पूर्ण झाल्यानंतर त्यांच्याकडून 'ग्रीन सिग्नल' घेतला जाणार आहे. त्यानंतर, या सात स्टेशनसाठी पात्र कंत्राटदाराची निवड अंतिम केली जाणार आहे. ही सर्व प्रक्रिया येत्या दोन महिन्यांत पूर्ण होण्याची अपेक्षा महामेट्रोच्या वरिष्ठ अधिकाऱ्यांनी व्यक्त केली.
या मार्गावर रामवाडी, कल्याणीनगर, येरवडा, बंडगार्डन, रुबी हॉल क्लिनिक, पुणे स्टेशन आणि मंगळवार पेठ (आरटीओ कार्यालय) अशी सात स्टेशन्सचे बांधकाम केले जाणार आहे. महामेट्रोच्या पिंपरी ते रेंजहिल्स आणि वनाझ ते शिवाजीनगर या मार्गांवरील स्टेशनचे बांधकाम यापूर्वीच सुरू झाले आहे. तर, मेट्रोच्या भुयारी मार्गाच्या बांधकामामध्येच स्टेशनच्या बांधकामाचा समावेश आहे. स्वारगेट येथे 'मल्टिमोडल हब' केले जाणार असून, या कामातच स्वारगेट मेट्रो स्टेशनच्या बांधकामाचे काम केले जाणार आहे. भुयारी मार्गावरील स्टेशनसाठी पात्र कंत्राटदाराची निवड अंतिम टप्प्यात असून, शिवाजीनगर-रामवाडी मार्गावरील स्टेशनसाठी कंत्राटदाराची निवड पूर्ण झाली, की मेट्रोच्या सर्व ३० स्टेशनच्या बांधकामाला गती प्राप्त होणार आहे.