म. टा. प्रतिनिधी, पिंपरी
मोबाइलचे दुकान फोडून चोरट्यांनी १६ लाख २५ हजार रुपयांचे १३७ मोबाइल फोन आणि एक लाख ४७ हजार रुपयांची रोकड असा एकूण १७ लाख ७२ हजार रुपयांचा ऐवज चोरून नेला. ही घटना आळंदी रोड, भोसरी येथे उघडकीस आली आहे.
विशाल भागाजी निमसे (३२, रा. चक्रपाणी वसाहत, भोसरी) यांनी या प्रकरणी भोसरी पोलिस ठाण्यात फिर्याद दिली आहे. त्यानुसार, अज्ञात चोरट्याविरोधात गुन्हा दाखल करण्यात आला आहे.
विशाल यांचे आळंदी रोडवर मोबाइल विक्रीचे दुकान असून, नेहमीप्रमाणे त्यांनी मंगळवारी रात्री दहा वाजता दुकान बंद केले. त्यानंतर रात्री अज्ञात चोरट्यांनी दुकानात विक्रीसाठी ठेवलेले १६ लाख २५ हजार रुपयांचे १३७ मोबाइल फोन आणि एक लाख ४७ हजार रुपयांची रोकड असा एकूण १७ लाख ७२ हजार रुपयांचा ऐवज चोरून नेला. हा प्रकार बुधवारी सकाळी दुकान उघडण्याच्या वेळी उघडकीस आला. या प्रकरणी भोसरी पोलिस तपास करीत आहेत.