म. टा. प्रतिनिधी, पिंपरी
रुपीनगर परिसरात अद्यापपर्यंत २५ ते ३० जणांना करोनाची लागण झाल्याने हा परिसर 'हॉटस्पॉट' झाला आहे. त्यामुळे प्रभाग क्रमांक १३ मध्ये पुढील तीन दिवस कडकडीत बंद राहणार आहे. या संबंधीचे पत्र उत्तम केंदळे यांनी पोलिस आयुक्त संदीप बिष्णोई आणि महापालिका आयुक्त श्रावण हर्डीकर यांना दिले आहे.
नागरिकांकडून आज, शुक्रवार १ मे ते रविवार ३ मे या दरम्यान कडकडीत पाळण्यात येणार आहे. बंद दरम्यान फक्त रुग्णालये, औषधविक्रीची दुकाने खुली राहणार आहेत. इतर सर्व दुकाने,भाजीपाला,इतर व्यवसाय बंद ठेवण्यात यावीत, असे आवाहन स्थानिक लोकप्रतिनिधी व नागरिकांकडून करण्यात आले आहे.
निगडी प्रभागातील येथील स्थानिक नागरिक, लोकप्रतिनिधी यांनी प्रशासनासोबत व निगडी पोलिस ठाणे वरिष्ठ पोलिस निरीक्षक गणेश जावदवाड यांच्याशी चर्चा करून याबाबत पोलिस आयुक्त व पालिका आयुक्त यांना निवेदन देण्यात आले आहे. विनाकारण रस्त्यावर फिरत असलेल्या नागरिकांवर पोलिसांकडून कडक कारवाई करण्यात येत आहे. बंदचे पालन न केल्यास अधिक कडक कारवाई करण्यात येईल, असे पोलिसांनी सांगितले. रुपीनगरमध्ये संसर्ग वाढल्याने चारही नगरसेवकांनी कडक संचारबंदी लागू करण्याचा निर्णय घेतला.
.
यमुनानगर, निगडीचा समावेश
यमुनानगर, निगडी, साईनाथनगर, सेक्टर नं. २२ आदी परिसरात पूर्णपणे कडकडीत बंद पाळण्याचा निर्णय परिसरामधील नागरीकांनी घेतलेला आहे. सर्व नागरिकांनी सहकार्य करण्याचे आवाहन नगरसेविका सुमनताई पवळे, कमल घोलप, सचिन चिखले व उत्तम केंदळे यांनी केले आहे.