टिंगरेनगरमध्ये धान्यासाठी आंदोलन

म. टा. प्रतिनिधी, येरवडा
गेल्या तीन महिन्यांपासून रेशनचे धान्य मिळत नसल्याने बर्माशेल येथील घरकाम आणि कष्टकरी महिलांनी जनवादी महिला संघटनेच्या मदतीने टिंगरेनगरमधील धान्य दुकानांसमोर आंदोलन केले. हक्काचे धान्य नाकारणाऱ्या दुकानदारांवर कारवाई करावी अशी मागणी त्यांनी या वेळी केली.
याबाबत संघटनेच्या महिलांनी गेल्या महिन्यात अन्न-धान्य वितरण अधिकारी आणि पालकमंत्री आणि स्थानिक आमदारांकडे तक्रारी केल्या होत्या. महिला रेशनकार्ड घेऊन धान्य दुकानात गेल्या असता, दुकान चालविणाऱ्या बचतगटाच्या महिलांनी वाईट वागणूक दिली, तसेच धान्याचा दर्जाही चांगला नसल्याची माहिती संघटनेच्या महिलांनी दिली.
कार्यालयाचे अव्वल कारकून तथा पुरवठा निरीक्षक सुनील रणपिसे यांनी महिलांना लेखी आश्वासन दिल्यानंतर आंदोलन थांबविण्यात आले. गेल्या काही महिन्यांपासून ज्यांना धान्य मिळाले नाही, त्यांचे बर्माशेल येथे जबाब नोंदविले जाणार आहेत. त्यानंतर अतिरिक्त धान्य मागवून महिलांना वाटप केले जाईल, असे आश्वासन त्यांनी दिले.
संघटनेच्या नेत्या किरण मोघे यांच्या नेतृत्वाखाली अध्यक्ष सुभद्रा खिलारे, सचिव हिराबाई घोंगे यांच्यासह महिलांनी आंदोलन केले.
किरण मोघे म्हणाल्या, ‘अन्न सुरक्षा कायद्यामुळे अनेक त्रुटी निर्माण झाल्या आहेत. त्यामुळे धान्य वितरण नीट केले जात नाही. टिंगरेनगर येथील ई - ८५ या क्रमांकाचे दुकान बचत गटातर्फे चालविण्यात येते. या दुकानाला बर्माशेल वस्तीतील पाचशेहून अधिक कुटुंबांचे रेशन कार्ड जोडलेले आहे. दुकान दूर अंतरावर असल्याने महिला पायपीट करावी लागते. गरिबांच्या हक्काचे धान्य न देणाऱ्या दुकानाचा परवाना निलंबित करण्यात यावा.’
...
बर्माशेल वस्तीतील कुटुंबांना धान्य मिळत नसल्याने रेशन दुकानासमोर आंदोलन झाले. ज्यांना धान्य मिळाले नाही अथवा कमी प्रमाणात मिळाले आहे, अशा कुटुंबांचे जागेवर जाऊन जबाब नोंदविले जाणार आहेत. त्याचा अहवाल तयार करून वरिष्ठांकडे पाठविला जाईल.
- सुनील रणपिसे, अव्वल कारकून, अन्न धान्य परिमंडळ ‘ई’ कार्यालय