कोथरूडमधील कुमार परिसर सोसायटीतील घटना
म. टा. प्रतिनिधी, पुणे
अभ्यास करताना सहाव्या मजल्याच्या गॅलरीतून पडून १७ वर्षांच्या विद्यार्थ्याचा मृत्यू झाल्याची घटना कोथरूड परिसरातील कुमार परिसर सोसायटी येथे रविवारी पहाटे घडली. या प्रकरणी कोथरूड पोलिस ठाण्यात आकस्मात मृत्यूची नोंद केली आहे.
आर्यन अखिलेश मुणगेंकर (वय १७) असे मृत्यू झालेल्या विद्यार्थ्याचे नाव आहे. तो कोथरूड परिसरातील कुमार सोसायटीत राहतो. त्याचे वडील एका नामांकित आयटी कंपनीत काम करतात. रविवारी पहाटे अडीचच्या सुमारास एक मुलगा गॅलरीतून पडल्याचा नियंत्रण कक्षाला फोन आला होता. त्यानुसार शास्त्रीनगर बीट मार्शल यांनी घटनास्थळी धाव घेतली. तसेच, तातडीने जखमी आर्यनला रुग्णालयात दाखल केले. पण, उपचारापूर्वीच त्याचा मृत्यू झाला होता. या प्रकरणी आकस्मात मृत्यूची नोंद करण्यात आली आहे. आर्यन अभ्यासात हुशार होता. तो बारावीमध्ये शिक्षण घेत होता. रविवारी पहाटे तो स्टूलवर बसून अभ्यास करीत होता. स्टूलवरून घसरून तो गॅलरीतून खाली पडल्याचे पालकांनी सांगितले. या घटनेचा तपास सुरू असल्याचे कोथरूड पोलिसांनी सांगितले.
सुरक्षारक्षाकडून प्रत्येक मजल्यावर जाऊन चौकशी
आर्यन बेडरूमच्या गॅलरीत बसून अभ्यास करीत होता. त्याने आतून कडी लावली होती. पहाटे दोन वाजता सुरक्षारक्षकाला काही तरी पडल्याचा आवाज आला. त्याने जाऊन पाहिल्यानंतर एक मुलगा खाली पडल्याचे दिसले. त्याच्याजवळ एक पुस्तकदेखील होते. सुरक्षारक्षकाने ते पुस्तक हातात घेऊन प्रत्येक मजल्यावर जाऊन चौकशी केली. एक मुलगा पडला असून, त्याच्या हातात 'अमुक-तमुक' पुस्तक आहे, असे विचारीत होता. सहाव्या मजल्यावर गेल्यानंतर आर्यनच्या पालकांना विचारल्यानंतर त्यांच्या लक्षात आले. त्यांनी मुलाचा दरवाजा वाजविला; पण तो आतून बंद असल्यामुळे उघडला नाही. शेवटी त्यांनी खाली धाव घेतली. आणि पाहिले असता तो आर्यनच असल्याचे आढळून आले, अशी माहिती पोलिसांनी दिली.