म. टा. प्रतिनिधी, पुणे
सावित्रीबाई फुले पुणे विद्यापीठाच्या सत्र परीक्षेच्या पेपर फेरतपासणींमधील त्रुटींविरोधात कुलगुरू कार्यालयासमोर आंदोलन करणाऱ्या इंजिनीअरिंग कॉलेजच्या विद्यार्थ्यांना पोलिसांनी ताब्यात घेण्याचा प्रकार मंगळवारी घडला. विद्यार्थ्यांनी कुलगुरू डॉ. नितीन करमळकर यांच्या गाडीला घेराव घालून गाडीवर चढण्याचा तसेच झेंडा तोडण्याचा प्रकार केल्याने त्यांना पोलिसांनी ताब्यात घेतले. मात्र, विद्यार्थ्यांवर गुन्हे दाखल करण्यात येणार नसल्याचे विद्यापीठ प्रशासनाने स्पष्ट केले.
विद्यापीठाचे मूल्यमापन आणि परीक्षा मंडळ पेपर फेरतपासणीबाबत गंभीर नसल्यामुळे मंगळवारी कुलगुरू कार्यालयासमोर काही विद्यार्थ्यांनी आंदोलन पुकारले होते. विद्यार्थ्यांना पेपर फेरतपासणीमध्ये गुण वाढत असल्याचे लेखी स्वरूपात आणण्यास सांगितले जाते. मात्र, त्याची अंमलबजावणी होत नाही. तसेच विद्यार्थ्यांना उत्तराच्या क्रमवार पायऱ्यांना गुण दिले जात नाहीत, गुणांची बेरीज करताना होणाऱ्या चुका याच्या विरोधात विद्यार्थ्यांनी आंदोलन पुकारले होते. कुलगुरू डॉ. नितीन करमळकर यांनी आंदोलक विद्यार्थ्यांच्या काही निवडक प्रतिनिधींशी चर्चा करण्याची तयारी दाखवली. मात्र, आंदोलक विद्यार्थ्यांनी कुलगुरूंनी आंदोलनाच्या ठिकाणी येऊन सर्व विद्यार्थ्यांशी चर्चा करावी अशी मागणी केली. कुलगुरू डॉ. करमळकर यांनी या मागणीकडे दुर्लक्ष केले आणि ते जाण्यासाठी निघाले. त्या वेळी आंदोलक विद्यार्थ्यांनी त्यांच्या गाडीला घेराव घातला. या वेळी विद्यार्थी आणि सुरक्षारक्षकांमध्ये धक्काबुक्की, तसेच सुरक्षारक्षकांसोबत शाब्दिक चकमकही उडाली. या वेळी विद्यार्थी आणि सुरक्षारक्षकांच्या धक्काबुक्कीत कुलगुरूंच्या गाडीच्या झेंड्याला धक्का लागला. तसेच विद्यार्थ्यांनी गाडीवर चढण्याचा प्रयत्न केला. दरम्यान पोलिस घटनास्थळी पोहोचले आणि त्यांनी आंदोलन करणाऱ्या विद्यार्थ्यांना ताब्यात घेतले.