म. टा. प्रतिनिधी, पुणे
लष्कराच्या राष्ट्रीय एकात्मता यात्रेअंतर्गत आसाम राज्यातील २० विद्यार्थी व दोन शिक्षक नुकतेच पुणे दौऱ्यावर आले होते. तीन दिवसांच्या पुणे दौऱ्यात त्यांनी लष्करी संस्थांबरोबरच पर्यटन स्थळांनाही भेट दिली. आसाममधील बसका जिल्ह्यातील महापालिका व जिल्हा परिषदेच्या शाळेतील हे विद्यार्थी नववी ते अकरावीच्या वर्गात शिकत आहेत. त्यांनी सात ते १० नोव्हेंबरदरम्यान पुण्याला भेट दिली.
लष्कराच्या राष्ट्रीय एकात्मता यात्रेअंतर्गत सीमावर्ती व घुसखोरप्रणित भागातील विद्यार्थ्यांना देशातील समृद्ध इतिहास, संस्कृती आणि सामाजिक समरसतेचे दर्शन घडविण्यात येते. त्याद्वारे या विद्यार्थ्यांमध्ये राष्ट्रीय एकात्मतेची भावना वाढण्यास मदत होते.
या विद्यार्थ्यांना पुण्यातील राष्ट्रीय संरक्षण अकादमी (एनडीए), खडकवासला धरण, सिंहगड किल्ला, कॅडेट ट्रेनिंग विंग, इंजिनीअरिंग कॉलेज, लष्करी वैद्यकीय महाविद्यालयाला भेट दिली. या विद्यार्थ्यांनी लष्कराच्या दक्षिण मुख्यालयाचे प्रमुख लेफ्टनंट जनरल एस. के. सैनी यांची भेट घेऊन, त्यांच्याशीही संवाद साधला. सैनी यांनी या विद्यार्थ्यांना या यात्रेचा उद्देश समजावून सांगितला. भारतातील विविधतेतील एकता, समृद्ध वारसा, धर्मनिरपेक्षता या मूल्यांविषयीही त्यांनी या विद्यार्थ्यांना मार्गदर्शन केले. विद्यार्थ्यांना स्मृतिचिन्हेही प्रदान केली.