म. टा. प्रतिनिधी, पुणे पुण्यात दररोज पाच ते सहा रुग्णांना प्रोस्टेट कॅन्सरच्या आजाराचे निदान होत असून, हा आजार ज्येष्ठांमध्ये सर्वाधिक होत आहे. या आजाराबाबत जनजागृती कमी आहे. हा आजार हाडांपर्यंत पसरल्यास तो बरा होण्यास ४ ते १० वर्षे लागतात. मात्र, योग्य निदान वेळीच झाल्यास हा आजार ९८ टक्के बरा होऊ शकतो, असे मूत्ररोग तज्ज्ञांनी सांगितले. दरम्यान, प्रोस्टेट कॅन्सरकडे दुर्लक्ष झाल्यास २०२०पर्यंत या आजाराच्या रुग्णांची संख्या वाढण्याची भीतीही व्यक्त होत आहे. देशात अन्य आजारांप्रमाणे ज्येष्ठांमध्ये होणाऱ्या प्रोस्टेट कॅन्सरचे प्रमाण अधिक वाढत आहे. रुबी हॉल क्लिनिकमधील मूत्ररोग तज्ज्ञ डॉ. राजेंद्र शिंपी यांनी याबाबत माहिती दिली. 'देशात प्रत्येक वर्षी प्रोस्टेट कॅन्सरचे सुमारे २५ हजार रुग्ण आढळतात. त्यावरून हा आजार वाढत असल्याचे दिसते. फुफ्फुस आणि तोंडाच्या कॅन्सरनंतर पुरुषांमध्ये दुसÚऱ्या क्रमांकावर या कॅन्सरचे स्थान असल्याचे दिसते. १९९०पासून प्रोस्टेट कॅन्सरचे प्रमाण २२० टक्क्यांनी वाढले आहेत. हा कॅन्सर होण्याची अनेक कारणे आहेत. वाढते शहरीकरण, कामाच्या ठिकाणचा ताण आणि बैठी कामे यामुळे २०२०पर्यंत या कॅन्सरमध्ये वाढ होण्याची भीती व्यक्त होत आहे. देशाच्या राष्ट्रीय प्रोस्टेट कर्करोग रजिस्ट्रीचा अंदाजसुद्धा असाच आहे. वय वाढणे, लठ्ठपणा, चुकीचा आहार, तसेच गुणसूत्रांतील प्रवृत्तीमुळे प्रोस्टेट कॅन्सर वाढण्याची शक्यता असते. आजाराचे लवकर निदान झाल्यास उपचार शक्य आहेत.' 'देशात गेल्या काही वर्षांत या आजाराच्या रुग्णांची ४५ हजारपेक्षा जास्त संख्या होती. पुण्यात दर महिन्याला ५ ते ६ रुग्णांना प्रोस्टेट कॅन्सरचा आजार झाल्याचे निदान होत आहे. हा कॅन्सर साधारणपणे ६५ ते ७० वयातील विशेषतः पुरुषांमध्ये होतो. या आजाराचे लवकर निदान झाल्यास तो बरा होण्याची ९८ टक्के शक्यता असते. हा कॅन्सर विशेषतः हाडांपर्यंत पसरला, तर कॅन्सरचा हा आजार पाहता तो बरा होण्यासाठी ४ ते १० वर्षे लागतात. या आजाराबाबत ग्रामीण, तसेच छोट्या शहरांमध्ये जनजागृती कमी आहे. त्यामुळे निदान चाचणी म्हणजेच 'सिरम पीएसओ' नियमीतपणे केली जात नाही. शहरात या चाचण्या केल्या जात असल्याने त्याचे लवकर निदान होते,' याकडे डॉ. शिंपी यांनी लक्ष वेधले.
प्रोस्टेट कॅन्सरवर यशस्वी उपचार शक्य
म टा प्रतिनिधी, पुणेपुण्यात दररोज पाच ते सहा रुग्णांना प्रोस्टेट कॅन्सरच्या आजाराचे निदान होत असून, हा आजार ज्येष्ठांमध्ये सर्वाधिक होत आहे...
महाराष्ट्र टाइम्स.कॉम 27 Nov 2019, 4:00 am