हवा परिपूर्णतेचा ध्यास

ज्येष्ठ भरतनाट्यम कलाकार डॉ. सुचेता चापेकर यांचे मत
म. टा. प्रतिनिधी, पुणे
‘कलाकाराने आपल्या कलाविष्कारासाठी परिपूर्णतेचा ध्यास व सातत्य दाखविले तर होणारा सांगीतिक प्रवास नक्कीच परिपूर्णतेच्या दिशेने असतो,' असे प्रतिपादन ज्येष्ठ भरतनाट्यम नृत्यगुरू डॉ. सुचेता भिडे-चापेकर यांनी केले.
निमित्त होते, गानवर्धन व नॅशनल सेंटर फॉर परफॉर्मिंग आर्ट्स, मुंबई यांनी आयोजित केलेल्या कार्यक्रमाचे. याप्रसंगी जयपूर-अत्रौली घराण्याच्या विदुषी गायिका मंजिरी आलेगावकर यांना डॉ. सुचेता भिडे-चापेकर यांच्या हस्ते ‘स्वरसाधना पुरस्कार’ प्रदान करण्यात आला. या प्रसंगी गायिका डॉ. वरदा गोडबोले, गानवर्धनचे अध्यक्ष कृ. गो. धर्माधिकारी, कार्याध्यक्ष प्रसाद भडसावळे, लता साठे, सुधीर कुलकर्णी उपस्थित होते.
‘ज्या संस्थेच्या व्यासपीठावर गायनस्पर्धेत सहभागी होऊन लहान वयात गुणिजनांचे आशीर्वाद मिळाले, तेथे या पुरस्काराने होणारा सन्मान सुखावणारा व जबाबदारीची जाणीव करून देणारा आहे. कुटुंबीयांचा पाठिंबा, गुरुजनांचा सहवास यामुळे हे साध्य होऊ शकले,’ अशी भावना आलेगावकर यांनी व्यक्त केली. कार्यक्रमाचे सूत्रसंचालन डॉ. नीलिमा राडकर यांनी केले. उत्तरार्धात डॉ. वरदा गोडबोले यांच्या शास्त्रीय गायनाची मैफल झाली. भरत कामत (तबला), सुयोग कुंडलकर (हार्मोनिअम), रोहित धारप व राजलक्ष्पी यांनी (तानपूरा) साथसंगत केली.
-------------
सासूबाईंशी सूर जुळलेलेच
आपल्या मनोगतात मंजिरी आलेगावर यांनी कार्यक्रमास उपस्थित आपल्या ९२ वर्षांच्या सासू विमल आलेगावकर यांचा आवर्जून उल्लेख केला. ‘माझ्या लग्नाआधी सासूबाई तीन वर्षे माझ्याकडे गाणं शिकल्या होत्या. संगीताच्या अशा अनोख्या नातेसंबंधामुळे लग्नानंतर इतकी वर्षे आमचे ‘सूर’ कधीच ‘बेसूर’ झाले नाहीत,’ अशी कोपरखळी त्यांनी मारली.