पत्नीच्या त्रासाला कंटाळून पतीनं घेतला गळफास

पुणे : पत्नीच्या सततच्या त्रासाला कंटाळून पतीने गळफास घेऊन आत्महत्या केल्याची धक्कादायक घटना एनडीए रोड परिसरात उघडकीस आली आहे. याप्रकरणी पत्नी, तिचा भाऊ व बहिण यांच्यावर गुन्हा दाखल करण्यात आला आहे.

अरुण सुरेश वाबळे (वय ३४, रा. कोंढवे-धावडे, एनडीए रोड) असे आत्महत्या केलेल्या पतीचे नाव आहे. याबाबत अरुण यांची आई जिजाबाई वाबळे (वय ५२) यांनी उत्तमनगर पोलिस ठाण्यात फिर्याद दिली आहे. त्यानुसार पत्नी अर्चना वाबळे उर्फ डावरे हिच्यासह तिघांवर आत्महत्येस प्रवृत्त केल्याचा गुन्हा दाखल केला आहे.

पोलिसांनी दिलेल्या माहितीनुसार, अरुण व अर्चना यांचा प्रेमविवाह झाला होता. अरुण पेटिंगचे काम करत होता; तर अर्चना ही खासगी शिकवणी घेत होती. त्यांना दोन मुले आहेत. मात्र, त्यांच्यात घरगुती कारणावरून वाद होत होते. यातून अर्चना, तिचा भाऊ व बहिण हे अरुण यांना मानसिक व शारीरिक त्रास देत होते. तसेच, त्यांनी अरुण यांना शिवीगाळ करून मारहाणही केली होती.

या सततच्या त्रासाला कंटाळून शनिवारी रात्री राहत्या घरी गळफास घेऊन त्यांनी आत्महत्या केली. याप्रकरणी सुरुवातीला आकस्मिक मृत्यूची नोंद करण्यात आली होती. चौकशीनंतर याप्रकरणी तिघांवर गुन्हा दाखल केला आहे. फौजदार नितीन शिंदे तपास करीत आहेत.