म. टा. प्रतिनिधी, पुणे
भारत आणि फ्रान्स या दोन देशांतील संबंध दृढ करण्यासह संशोधन, नावीन्यपूर्ण संकल्पनांना चालना देण्यासाठी सुरू झालेल्या 'इंडो फ्रेंच नॉलेज समिट'च्या आयोजनाचा मान सावित्रीबाई फुले पुणे विद्यापीठाला मिळाला आहे. पुढील वर्षी ४ आणि ५ मार्च २०२१ रोजी ही परिषद होणार असून, फ्रान्स आणि भारत सरकारचे उच्चस्तरीय अधिकारी, शिक्षण संस्था, संशोधन संस्था, उद्योग क्षेत्रातील प्रतिनिधींचा परिषदेत सहभाग असेल.
फ्रान्सच्या मुंबई कार्यालयातील महावाणिज्य दूत सोनिया बार्बरी, विद्यापीठाचे कुलगुरू डॉ. नितीन करमळकर यांनी पत्रकार परिषदेत ही माहिती दिली. आंतरराष्ट्रीय स्तरावर महत्त्व असलेल्या या परिषदेबाबतचे पहिले वृत्त 'महाराष्ट्र टाइम्स'ने प्रकाशित केले होते. बार्बरी म्हणाल्या, 'अवकाश विज्ञान, संरक्षण अशा क्षेत्रांत भारत आणि फ्रान्स एकमेकांचे सहकार्य घेत आहेत. दोन्ही देशांसाठी विद्यापीठे आणि संशोधन महत्त्वाचे घटक आहेत. त्यामुळे या दोन्ही देशांना एकत्र येऊन काम करणे शक्य आहे. पुणे शिक्षणाचे केंद्र असल्याने ही परिषद सावित्रीबाई फुले पुणे विद्यापीठात घेण्याचे ठरले. या पूर्वीच्या दोन परिषदांमध्ये सुरू झालेले प्रकल्प पुण्यात होणाऱ्या तिसऱ्या परिषदेत सादर केले जातील. ही परिषद फलदायी ठरणार आहे.' या समिटमध्ये अवकाश विज्ञान, कृत्रिम बुद्धिमत्ता, व्यवस्थापन अशी नऊ प्रमुख क्षेत्रे आणि संबंधित विषयांवर चर्चा केली जाईल. विद्यापीठांशी सामंजस्य करार केले जातील, विविध विषयांवरील एकत्रित संशोधन प्रकल्प राबवण्यासंदर्भातील ठराव केले जाणार आहेत.
सावित्रीबाई फुले पुणे विद्यापीठाला या परिषदेच्या आयोजनाचा मान मिळणे ही आनंदाची बाब आहे. विद्यापीठ अन्य संस्थांच्या सहकार्याने ही परिषद आयोजित करेल. या परिषदेमुळे विद्यार्थ्यांची देवाणघेवाण, नव्या विषयांसंदर्भातील अभ्यासक्रम, काही महत्त्वाचे प्रकल्प हाती घेता येतील. दोन परिषदांमुळे एव्हिएशन, इलेक्ट्रिक मोबिलिटीसंदर्भातील दोन अॅडव्हान्स्ड सेंटर निर्माण झाली. त्यामुळे या परिषदेतूनही शिक्षण, संशोधन, विज्ञानासंदर्भातील महत्त्वाच्या घडामोडी होणार आहेत.
- डॉ. नितीन करमळकर, कुलगुरू, सावित्रीबाई फुले पुणे विद्यापीठ