पद्म पुरस्कारासाठी ‘घालीन लोटांगण’

सुरेश वाडकर यांनी आळवला ‘शरदराग’

म. टा. प्रतिनिधी, पुणे

‘अरुण दाते यांना राज्यात अनेक सन्मान मिळाले, पण राष्ट्रीय पातळीवर त्यांची अद्याप दखल घेतलेली नाही. त्यांच्यापेक्षा कनिष्ठांना पद्मश्री, पद्मभूषणने गौरविण्यात आले. राजाश्रय देणारे शहनशहा म्हणजे शरद पवार साहेब आहेत. अरुभय्यांप्रमाणे मीही वयाने मोठा होत जाणार असून, त्यांना आणि मला भविष्यात पद्म सन्मान मिळावेत, या साठी पवार साहेबांच्या चरणी प्रार्थना करतो,’ या शब्दांत प्रसिद्ध गायक सुरेश वाडकर यांनी रविवारी पवारांपुढे ‘लोटांगण’घातले.

शरद क्रीडा व सांस्कृतिक प्रतिष्ठानतर्फे ज्येष्ठ गायक अरुण दाते यांना ‘राम कदम कलागौरव पुरस्कार’ शरद पवार यांच्या हस्ते प्रदान करण्यात आला. अमरावतीच्या शेखर पाटील यांना ‘आदर्श कार्यकर्ता’ पुरस्काराने गौरविण्यात आले. या वेळी वाडकर यांनी पद्म पुरस्कारासाठी पवारांना साकडे घातले. महापौर प्रशांत जगताप, पिंपरी-चिंचवडच्या महापौर शकुंतला धराडे, आमदार अनिल भोसले, जिल्हा परिषदेचे अध्यक्ष प्रदीप कंद, श्यामला गायकवाड, अमेर सालेम, नितीन दरोडे, विजय कदम आणि प्रतिष्ठानचे अध्यक्ष लक्ष्मीकांत खाबिया या वेळी उपस्थित होते.
पवार म्हणाले, ‘व्यक्तिगत जीवनात प्रत्येकाला भावणारी, रूजणारी गाणी दाते यांनी गायली आहेत. कला, साहित्य व संगीताचा सन्मान करण्याची भूमिका महाराष्ट्राने जाणीवपूर्वक घेतली आहे.' कार्यक्रमाच्या पूर्वार्धात आणि उत्तरार्धात गाण्यांची मैफल रंगली. सूत्रसंचालन प्रणित कुलकर्णी यांनी केले.

विनामूल्य प्रवेशची खिल्ली

पाऊस सुरू असल्याने कार्यक्रमाला गर्दी होईल की नाही, अशी शंका उपस्थित करण्यात आली होती. पण, पुणे गुणीजनांचा आदर करणारे शहर आहे. तसेच पत्रिकेत ‘प्रवेश विनामूल्य’ अशी तळटीप असल्याने गर्दी झाली, अशी खिल्ली पवार यांनी उडवताच गर्दीने गच्च भरलेल्या बालगंधर्व रंगमंदिरात हशा उसळला.