मेट्रो स्टेशनसाठी लवकरच सर्वेक्षण

शिवाजीनगर-हिंजवडीसाठी ‘पीएमआरडीए’ घेणार पुढाकार

म. टा. प्रतिनिधी, पुणे

‘शिवाजीनगर ते हिंजवडी’ मेट्रो प्रकल्प राबवण्यासाठी नेमकी किती जागा लागणार आहे, सरकारी-खासगी जागेचे प्रमाण काय असेल, ही जागा कशा स्वरूपात मिळवावी लागेल, याचा आढावा घेण्यासाठी ‘पुणे महानगर प्रदेश विकास प्राधिकरणा’तर्फे (पीएमआरडीए) लवकरच या मार्गावरील जागांचे सर्वेक्षण केले जाणार आहे. येथील काही भाग विकसित असला, तरी मेट्रोच्या दृष्टीने कोणत्या जागांचा व्यावसायिकदृष्ट्या विकास करणे शक्य आहे, याची चाचपणी केली जाणार आहे.
‘पीएमआरडीए’तर्फे शिवाजीनगरते हिंजवडी दरम्यान २३ किमीचा मेट्रो मार्ग निर्माण केला जाणार आहे. शिवाजीनगर येथील धान्य गोदामापासून ते हिंजवडीतील मेगापोलिस सर्कलपर्यंतच्या या मार्गावर २३ स्टेशन असतील. सार्वजनिक-खासगी भागीदारीतून (पीपीपी) विकसित केल्या जाणाऱ्या या मेट्रोसाठी सध्या जागतिक स्तरावरून निविदा मागविण्यात आल्या आहेत. या निविदेची मुदत २२ जूनला संपणार असून, तत्पूर्वी मेट्रोसाठी लागणाऱ्या जागेचे सर्वेक्षण करण्याचा निर्णय ‘पीएमआरडीए’ने घेतला आहे. गणेशखिंड रस्ता, बाणेर रस्ता, बालेवाडी स्टेडियम, वाकड या मार्गे मेट्रो जाणार असल्याने स्टेशनसाठी कोणत्या जागा लागतील, यासाठी हे सर्वेक्षण केले जाणार आहे.
मेट्रोचा हा संपूर्ण मार्ग उन्नत (एलिव्हेटेड) स्वरूपाचा असल्याने त्यासाठी भूसंपादन करावे लागले नाही, तरी मेट्रो मार्गावर २३ स्टेशन असल्याने त्यासाठी ‘पीएमआरडीए’ला मोठ्या प्रमाणात जागा लागणार आहे. हिंजवडी परिसरातील स्टेशनसाठी महाराष्ट्र औद्योगिक विकास महामंडळाकडे (एमआयडीसी) जागेची मागणी केली जाणार असून, काही स्टेशनसाठी पोलिसांच्या ताब्यातील जागा मेट्रोला ताब्यात घ्यावी लागणार आहे, असे संकेत ‘पीएमआरडीए’चे आयुक्त किरण गित्ते यांनी दिले. वेगवेगळ्या स्टेशनसाठी नेमकी किती सरकारी जागा घ्यावी लागेल; तसेच किती खासगी जागा संपादित करावी लागेल, हे सर्वेक्षणानंतर स्पष्ट होईल, असेही त्यांनी नमूद केले.

शिवाजीनगर ते हिंजवडी मेट्रो आर्थिकदृष्ट्या सक्षम होण्यासाठी बहुतांश स्टेशनचा व्यावसायिक दृष्टीने विकास करणे गरजेचे आहे. त्यादृष्टीने, योग्य जागांचा शोध या सर्वेक्षणातून घेतला जाणार आहे.
किरण गित्ते, आयुक्त, पीएमआरडीए

भूमिपूजनाच्या आश्वासनाचे काय?
पालिका निवडणुकांच्या प्रचार सभेमध्ये शिवाजीनगर-हिंजवडी मेट्रो प्रकल्पाला गती देण्यात आली असून, त्याचे भूमिपूजन एप्रिलमध्ये केले जाणार असल्याचे आश्वासन मुख्यमंत्री देवेंद्र फडणवीस यांनी दिले होते. त्यादृष्टीने, पीएमआरडीएने निविदा मागवल्या असल्या, तरी त्याला आतापर्यंत तीनवेळा मुदतवाढ देण्यात आली आहे. आयटी क्षेत्रातील अनेक कर्मचाऱ्यांकडून शिवाजीनगर-हिंजवडी मेट्रोच्या प्रगतीबाबत सातत्याने विचारणा केली जात असून, त्याचे काम केव्हा सुरू होणार, याबाबत सर्वांनाच उत्सुकता आहे.