नड्डांना जाब विचारून स्वाभिमान राखत एकनाथ शिंदेंनी राजीनामा द्यायला हवा: सुषमा अंधारे

पुणे : आगामी काळात प्रादेशिक पक्ष संपतील असे विधान भाजप अध्यक्ष जगत प्रकाश नड्डा यांनी केले आहे. विशेष म्हणजे शिवसेनेवर हल्ला चढवत शिवसेना आता समाप्तीकडे चालली आहे, असं म्हटलंय. यावरून आता शिवसेना उपनेत्या सुषमा अंधारे यांनी नड्डा यांचा समाचार घेत मुख्यमंत्री एकनाथ शिंदे यांना भाजपची साथ सोडण्याचे आवाहन केले आहे.

शिवसेना संपत चालली आहे असं म्हणणाऱ्या नड्डा यांना जाब विचारत माननीय मुख्यमंत्री साहेबांनी स्वाभिमान राखत तातडीने भाजपपासून बाहेर पडून राजीनामा दिला पाहिजे, असे आवाहन सुषमा अंधारे यांनी एकनाथ शिंदे यांना केले आहे.

शिवसेनेचा अंत जवळ येत आणि एकनाथ शिंदे असं म्हणत आहेत की आमचीच शिवसेना खरी. मग नड्डा नेमकी कोणती शिवसेना संपवायला निघाले आहेत?, असा सवाल सुषमा अंधारे यांनी केला आहे. दरम्यान, शिवसेना वाचवण्यासाठी मी हे पाऊल उचलले आहे, असं मुख्यमंत्री म्हणतात. तर केसरकर, गोगावले, शिरसाट उर बडवून सांगतात आमचीच शिवसेना खरी. मग आता ते नड्डा यांना काही ऐकवणार आहेत का?, असा सवाल देखील सुषमा अंधारे यांनी शिंदे गटातील नेत्यांना केला आहे.

रातकिडा, बांडगुळं; भाजपवर टीका करताना शिवसेनेच्या नेत्या पाहा काय, काय बोलून गेल्या

दुसरीकडे भगतसिंह कोश्यारी नावाचे राज्यपाल आपल्या घटनात्मक पदाची गरिमा विसरून महाराष्ट्रात दुही निर्माण करण्यासाठी जाणीवपूर्वक महाराष्ट्राचा सामाजिक, आर्थिक आणि सांस्कृतिक इतिहास पुसण्याचा प्रयत्न करत आहेत. मात्र मुख्यमंत्री एकनाथ शिंदे काहीच बोलत नाहीत. गप्प आहेत, अशी जोरदार टीकाही सुषमा अंधारे यांनी मुख्यमंत्री एकनाथ शिंदे यांच्यावर केली आहे.

तशीच दाढी, कपाळावर लाल टिळा, पुण्यातले हे एकनाथ शिंदे पाहिलेत का?