ईडीच्या विरोधात राज्यभरात 'जेलभरो' करणार; सुषमा अंधारेंची माहिती

म. टा. प्रतिनिधी, पुणे : ‘विरोधी पक्षातील लोकांवर सातत्याने सक्तवसुली संचलनालयाच्या (ईडी) माध्यमातून धाडी टाकून त्यांचा आवाज बंद करण्याचा प्रयत्न केला जात आहे. त्यामुळे ‘ईडी’विरोधात राज्यभरात जेलभरो आंदोलन करण्यात येणार आहे,’ अशी माहिती शिवसेनेच्या (ठाकरे गट) उपनेत्या सुषमा अंधारे यांनी रविवारी दिली.

शिवसेनेच्या (ठाकरे) पक्ष कार्यालयात रविवारी आयोजित पत्रकार परिषदेत अंधारे बोलत होत्या. त्या वेळी शहरप्रमुख संजय मोरे, गजानन थरकुडे, आनंद भोईर आदी उपस्थित होते.

अंधारे म्हणाल्या, ‘जेलभरो आंदोलनासंदर्भात वरिष्ठ पातळीवर महाविकास आघाडीच्या पदाधिकाऱ्यांसोबतही चर्चा सुरू आहे. देशातील स्वायत्त संस्थांच्या गैरवापराबद्दल विविध पक्षांच्या नऊ प्रमुखांनी पंतप्रधानांना पत्रव्यवहार केला आहे. मात्र, पंतप्रधान किंवा त्यांच्या कार्यालयाने उत्तर देणे अपेक्षित असताना भाजपचे प्रवक्तेच याविषयी जास्त बोलत आहेत.’

‘त्या प्रकरणात सोमय्या शांत कसे?’

‘किरीट सोमय्या यांनी यापूर्वी प्रताप सरनाईक, आनंदराव अडसूळ, भावना गवळी, यशवंत जाधव, अर्जुन खोतकर यांच्या विरोधात रान पेटवले होते. आर्थिक घोटाळा बाहेर काढण्यासाठी सरनाईक यांच्या विरोधात २२ पत्रकार परिषदा घेतल्या. भावना गवळी यांच्या विरोधात आठ, यशवंत जाधव यांच्या विरोधात १६, अर्जुन खोतकरांच्या विरोधात नऊ पत्रकार परिषदा घेतल्या. मात्र, आता संबंधित नेत्यांनी पक्ष बदलताच सोमय्यांनी त्या प्रकरणांवर बोलणे सोडले. ते आता शांत कसे झाले,’ असा प्रश्न अंधारे यांनी उपस्थित केला.

ईडीच्या सर्व कारवायांबद्दल किरीट सोमय्या यांना कशी माहिती मिळते. ईडीचे अधिकारी सत्यव्रत कुमार हे गेल्या नऊ वर्षांपासून एकाच ठिकाणी कार्यरत आहेत. त्यांच्या कार्यपद्धतीवर कोणालाच आक्षेप नाही का?, एकाच ठिकाणी एवढी वर्षे काम करता येते का?, केंद्र सरकारकडून संबंधित अधिकाऱ्याला वरदहस्त आहे का?- सुषमा अंधारे, उपनेत्या, शिवसेना (ठाकरे गट)