म. टा. प्रतिनिधी, पुणे
मनोरंजन क्षेत्रापाठोपाठ आता शैक्षणिक संस्थामध्ये देखील 'मी टू' चळवळ जोर धरायला लागली असून सिम्बायोसिस आंतरराष्ट्रीय अभिमत विद्यापीठाच्या 'सिम्बायोसिस सेंटर फॉर मीडिया अँड कम्युनिकेशन'मधूनही लैंगिक शोषणाबाबतचे काही प्रकार सोशल मीडियातून समोर आले आहेत. आता तर, सिम्बायोसिसमधील काही आजी-माजी विद्यार्थिनींनी एकत्र येऊन लैंगिक शोषणाविरोधात सोशल मीडियावर हे अनुभव शेअर करायला सुरुवात केली असून, या विरोधात मोहीम उघडली आहे.
सिम्बायोसिस सेंटर फॉर मीडिया अँड कम्युनिकेशनमध्ये (एससीएमसी) दहापेक्षा अधिक विद्यार्थिनींनी ट्विटरद्वारे त्यांच्याबाबतीत घडलेल्या लैंगिक शोषणाच्या प्रकारांविषयी व्यक्त होण्यास सुरुवात केली. त्यात त्यांनी काही विद्यार्थी आणि प्राध्यापकांच्या नावांचाही उल्लेख केला. तसेच विमाननगर कॅम्पसमध्ये अशा प्रकारांची 'संस्कृती' असल्याचेही लिहिले आहे. एका माजी विद्यार्थिनीने तिच्या इंटर्नशिपदरम्यान झालेल्या लैंगिक शोषणाविरोधात कॉलेजातील इंटर्नशिप समन्वयकाकडे तक्रार केली असता, तिची इंटर्नशिप थांबवण्यात आल्याचे नमूद केले आहे. तसेच, लैंगिक शोषणाबाबत प्रशासनाचे लक्ष वेधूनही काहीच कारवाई झाली नसल्याचा आरोपही विद्यार्थिनींनी आपल्या ट्विटरवरील पोस्टमधून केला. आमच्या शिक्षकांपैकी वरिष्ठ शिक्षकाने आमच्यासमोर अनेक आक्षेपार्ह विधाने केली आहेत. एका मुलीला चुकीचा स्पर्श केल्याच्या प्रकरणाविषयी बोलताना काही शिक्षकांनी फारच खालची पातळी गाठली होती. आम्हाला आमच्या तक्रारी नोंदवण्यासाठी खास कमिटी होती, याबाबत काहीच कल्पना नव्हती, असेही एका माजी विद्यार्थिनीने सांगितले. या प्रकाराची दखल घेऊन ८ ऑक्टोबरला एससीएमसीच्या अंतर्गत तक्रार निवारण समितीने फेसबुक पेजवर 'ओपन लेटर' लिहून माफी मागितली. तसेच कॉलेजमधील सध्याच्या आणि माजी विद्यार्थिनींना पुढे येऊन अंतर्गत तक्रार समितीकडे तक्रारी नोंदवण्याचे, सुधारणेसाठी सूचना करण्याचे आवाहन करत कारवाई करण्याचे आश्वासन दिले.
........
'एससीएमसी'च्या विद्यार्थिनींनी केलेल्या तक्रारींची दखल घेऊन बुधवारी कुलगुरू आणि अधिष्ठातांची बैठक पार पडली. या बैठकीत अंतर्गत तक्रार निवारण समितीने विद्यार्थिनींनी केलेल्या तक्रारींबाबत चर्चा करण्यात आली. तक्रारींची शहानिशा करण्यासाठी विद्यार्थिनींशी चर्चा करण्यासोबतच संवाद साधण्यात येईल. त्यानंतर संबंधित प्राध्यापकांची चौकशी करण्यात येईल. या संपूर्ण प्रक्रियेला दोन ते तीन दिवसांचा कालावधी जाईल. त्यानंतर समितीच्या अहवालावर कुलगुरू निर्णय घेतील.
- डॉ. विद्या येरवडेकर, प्रधान संचालिका, सिम्बायोसिस संस्था