म. टा. प्रतिनिधी, पुणे
तडीपारीच्या आदेशाचे उल्लंघन करून शहरात आलेल्या एका सराईत गुन्हेगाराला गुन्हे शाखा युनिट तीनच्या पथकाने गावठी कट्ट्यासह अटक केली. अक्षय श्रीकांत आधवडे (वय २६, रा. अप्पर इंदिरानगर) असे त्याचे नाव आहे.
पोलिसांनी त्याच्याकडून गावठी कट्टा, दोन काडतुसे असा ३० हजारांचा मुद्देमाल जप्त केला. आधवडे रेकॉर्डवरील गुन्हेगार आहे. या प्रकरणी आधवडे याच्याविरुद्ध वारजे माळवाडी पोलिस स्टेशनमध्ये आर्म अॅक्टसह गुन्हा दाखल करण्यात आला आहे.
उपनिरीक्षक किरण अडागळे त्यांच्या पथकासह गस्तीवर असताना, सराईत गुन्हेगार आधवडे तडीपार असूनही शहरात येणार असल्याची माहिती मिळाली. त्यानुसार पोलिसांनी सापळा रचून वारज्यातील गणेश विसर्जन घाटावरून ताब्यात घेतले. आरोपी रेकॉर्डवरील सराईत गुन्हेगार असून त्याच्यावर गंभीर गुन्हे दाखल आहेत. त्यामुळे त्याला शहरातून तडीपार करण्यात आल्याचे वरिष्ठ निरीक्षक राजेंद्र मोकाशी यांनी सांगितले.