अल्पवयीन मुलीचा फोटो पडला महागात

तरुणाला दोन वर्षे सक्तमजुरीची शिक्षा

म. टा. प्रतिनिधी, पुणे
कोणत्याही व्यक्तीचा विनापरवानगी फोटो काढणे हे कृत्य गुन्ह्यात मोडते. असा प्रकार केल्यास शिक्षाही होऊ शकते. सध्या प्रत्येकाच्या हातात स्मार्टफोन आल्याने अशाप्रकारचे फोटो काढण्याची लाटच आली आहे. हाती मोबाइल असल्याने आपण कोणाचाही, कधीही फोटो काढू शकतो अशा अविभार्वात असणाऱ्या तरुणाला नुकतीच कोर्टाने दोन वर्षे सक्तमजुरी आणि हजार रुपये दंडाची शिक्षा सुनावली.

पीडित तरुणी भावाबरोबर बॅडमिंटन खेळत होती. त्यावेळी जवळून जाणाऱ्या तरुणाने मुलीचा फोटो काढला. गणेश मारुती पारखे (वय २५, रा. कात्रज) असे शिक्षा झालेल्या आरोपीचे नाव आहे. या प्रकरणी संबं​धित मुलीने फिर्याद दिली होती. १४ जून २०१४ रोजी ही घटना घडली. या केसचे कामकाज सरकारी वकील सुनील मोरे यांनी पाहिले. त्यांनी या केसमध्ये चार साक्षीदार तपासले.

फिर्यादीचा फोटो काढताना पारखे याला रंगेहाथ पकडलेल्या व्यक्तीची साक्ष या प्रकरणी महत्त्वाची ठरली. फिर्यादी कात्रज परिसरात राहावयास आहे. पारखे हा नेहमी फिर्यादीला त्रास देत असे; तिच्याकडे पाहून अश्लील हावभाव करीत असे. घटनेच्या दिवशी फिर्यादी भावासोबत बॅडमिंटन खेळत होती. त्यावेळी पारखे तिचा फोटो काढत होता. हे रस्त्यावरून जाणाऱ्या नागरिकाच्या लक्षात आले. त्याने पारखेला रंगेहाथ पकडले आणि त्याचा मोबाइल काढून घेतला. त्यानंतर पोलिसांना बोलावून पारखेला त्यांच्या देण्यात आले. पोलिसांनी जप्त केलेल्या मोबाइलमध्ये फिर्यादी मुलीचे फोटो आढळले. या प्रकरणी कोर्टाने विनयभंग आणि बाललैंगिक अत्याचार प्रतिबंधक कायद्यानुसार आरोपीला दोषी धरून शिक्षा सुनावली. विशेष न्यायाधीश जे. टी. उत्पात यांच्या कोर्टाने हा निकाल दिला.