दारूड्या शिक्षकाने पत्नीचा केला खून

बारा वर्षाच्या मुलाने अनुभवला थरार; वानवडीतील प्रकार

म . टा. प्रतिनिधी, हडपसर

बारा वर्षाच्या मुलासमोर दारूच्या नशेत शिक्षक पतीने शिक्षिका असलेल्या पत्नीचा धारदार चाकूने खून केल्याचा प्रकार घडला. उघड्या डोळ्याने हा प्रकार पाहणाऱ्या मुलाने नराधम बापाला कुलूप फेकून मारले आणि आरडाओरडा करीत तेथून पळ काढला. ही घटना वानवडीतील आझादनगर येथे रविवारी पहाटे घडली .
स्नेहा सुनील कदम (वय ३५ रा. मनूचंद्र सहकारी गृहनिर्माण सोसायटी, आझादनगर, वानवडी) असे मयत शिक्षिकेचे नाव आहे. या बाबत सुनील दत्तात्रय कदम (वय ४० मूळ रा. पाथर्डी, जि. नगर, सध्या रा. लोणीकाळभोर, हवेली, जि. पुणे ) याला वानवडी पोलिसांनी अटक केली आहे. शिक्षिकेचे वडील बाबासाहेब केसू चव्हाण ( वय ५९, रा. ससाणेनगर, हडपसर ) यांनी फिर्याद दिली आहे.
पोलिस निरीक्षक मच्छिंद्र पंडित यांनी दिलेल्या माहितीनुसार, स्नेहा आणि सुनील यांचा २०००मध्ये विवाह झाला. त्यांना बारा वर्षांचा मुलगा आणि पाच वर्षांची मुलगी आहे. स्नेहा वानवडी येथील महापालिकेच्या शाळेत, तर सुनील पिंपळे सांडस येथील जिल्हा परिषदेच्या शाळेत कार्यरत आहे. या दोघांमध्ये नेहमी भांडणे होत असत. याबाबत २०१२मध्ये सुनील यांच्याविरोधात कौटुंबिक हिंसाचार प्रकरणी गुन्हा दाखल झाला होता. तेव्हापासून ते विभक्त राहत होते. मात्र, गेल्या आठ दिवसांपासून सुनील मुलांच्या भेटीच्या निमित्ताने यायचा. ११ फेब्रुवारीला सुनील, स्नेहा आणि मुले फिरायलाही गेले होते. रात्री आठच्या सुमारास त्यांना सोडून तो निघून गेला. रविवारी पहाटे तो पुन्हा दारू पिऊन आला. त्यानंतर काही वेळाने दोघांमध्ये भांडणे सुरू झाली. सुनील दारू पिऊन आल्याने स्नेहाने त्याला बाहेर झोपण्यास सांगितले. मात्र, त्याने जबरदस्तीने दरवाजा ढकलून आत प्रवेश केला आणि खिशातील धारदार चाकूने दोनवेळा स्नेहाच्या छातीत वापर केले. भांडणांचा आवाज आल्याने जागा झालेल्या मुलाने हा प्रकार पाहिला आणि जवळील कुलूप वडिलांच्या दिशेने भिरकावले.
दरम्यान, स्नेहाने मदतीसाठी आरडाओरडा केला. ते पाहून सुनीलने घरातील दुसरा चाकू स्नेहाच्या हातात ठेवला. ज्या चाकूने वार केला, तो चाकू खिशात ठेवून पळ काढला. आवाज ऐकून आलेल्या शेजाऱ्यांनी रक्ताच्या थारोळ्यात पडलेल्या स्नेहाला रुग्णालयात दाखल केले. मात्र, उपचारापूर्वीच डॉक्टरांनी तिला मयत घोषित केले.