पुणे मेट्रो : पहिल्या प्रवासासाठी तुफान गर्दी; मात्र तिकीट ॲपमध्ये तांत्रिक अडथळे

पुणे : पंतप्रधान नरेंद्र मोदी यांनी आज पुणे मेट्रोचं उद्घाटन केलं. उद्घाटनानंतर मोबाइलद्वारे पेमेंट करून पंतप्रधान मोदींनी पुणे मेट्रोचं तिकीट घेतलं आणि शाळकरी मुलांसोबत गरवारे कॉलेज स्थानकावरून आनंद नगरपर्यंत मेट्रोने प्रवास केला. या उद्घाटन सोहळ्यानंतर सर्वसामान्य नागरिकांसाठीही मेट्रो सेवा खुली करण्यात आली. मोठ्या प्रतिक्षेनंतर शहरात मेट्रो सेवा (Pune Metro News) सुरू झाल्यानंतर प्रवासाचा आनंद लुटण्यासाठी पुणेकरांनी तुफान गर्दी केली. मेट्रो स्थानकावर तिकीट खरेदीसाठी प्रवाशांची मोठी रांग लागल्याचं पाहायला मिळालं.

पुणेकरांनी 'गणपती बाप्पा मोरया' अशा घोषणा देत आणि छत्रपती शिवाजी महाराज यांचा जयघोष करत मेट्रो प्रवासाला सुरुवात केली. यावेळी नागरिकांच्या चेहऱ्यावरील आनंद ओसंडून वाहत होता. अनेक कुटुंबांनी आपल्या लहान बालकांसह पहिल्या दिवशी मेट्रो प्रवासाचा आनंद लुटला.

पुणे मेट्रोचं उद्घाटन करताना पंतप्रधान मोदींचा काँग्रेस-राष्ट्रवादीला टोला; म्हणाले...

ऑनलाईन तिकीट अ‍ॅपमध्ये तांत्रिक अडथळे

तब्बल १२ वर्षांच्या प्रतिक्षेनंतर अखेर पुणे शहरात मेट्रो सेवेला सुरुवात झाली. मात्र पहिल्याच दिवशी ऑनलाईन तिकीट खरेदी करताना तांत्रिक अडथळे येऊ लागले आहेत. त्यामुळे ऑनलाईन तिकीट खरेदी करण्याच्या प्रयत्नात असणाऱ्या नागरिकांच्या पदरी निराशा पडली.

दरम्यान, पुणे मेट्रोच्या उद्घाटन सोहळ्याला पंतप्रधान नरेंद्र मोदी यांच्यासह राज्यपाल भगतसिंह कोश्यारी, राज्याचे उपमुख्यमंत्री आणि पुण्याचे पालकमंत्री अजित पवार, विधानसभेचे विरोधी पक्षनेते देवेंद्र फडणवीस, शहराचे महापौर मुरलीधर मोहोळ यांच्यासह अनेक मान्यवर उपस्थित होते.