प्रवीण चव्हाणांनी आरोप केलेले तेजस मोरे पहिल्यांदाच समोर; केला 'हा' धक्कादायक खुलासा

म. टा. प्रतिनिधी, पुणेः 'विशेष सरकारी वकील प्रवीण चव्हाण यांच्या कार्यालयात छुपा कॅमेरा असलेले घड्याळ आपण बसविलेले नाही,' असा दावा करीत त्यांचे अशील तेजस मोरे यांनी प्रवीण चव्हाण यांच्या आरोपाला प्रत्युत्तर दिले. 'विशेष सरकारी वकील प्रवीण चव्हाण एकाला माफीचा साक्षीदार करून, भाजप नेते गिरीश महाजन यांच्यावर ड्रग्जचा आरोप करणार होते. गिरीश महाजन यांचे ड्रगचे सिंडिकेट असल्याचा या साक्षीदाराचा जबाब त्यांनी माझ्याकडून लिहून घेतला होता; तसेच गिरीश महाजन यांना काहीही करून 'मकोका'खाली अटक करण्याचा त्यांचा प्रयत्न होता. तसे तत्कालीन गृहमंत्री अनिल देशमुख आणि एकनाथ खडसे हे प्रवीण चव्हाण यांना सांगत होते,' असे खळबळजनक आरोपही तेजस मोरे यांनी केले.

भाजपच्या नेत्यांना खोट्या गुन्ह्यात अडकविण्यासाठी विशेष सरकारी वकील प्रवीण चव्हाण यांच्या पुण्यातील कार्यालयात कट रचला जात असल्याचा आरोप विरोधी पक्षनेते देवेंद्र फडणवीस यांनी विधानसभेत केला होता. या संदर्भातील कथित 'स्टिंग ऑपरेशन'चे 'पेनड्राइव्ह' त्यांनी सादर केले होते. प्रवीण चव्हाण यांनी हे आरोप फेटाळून लावताना, हे 'स्टिंग ऑपरेशन' तेजस मोरे या अशिलाने केले असल्याचा आरोप केला होता. त्यावर तेजस मोरे यांनी वृत्तवाहिन्यांशी दुरध्वनीद्वारे संवाद साधत प्रवीण चव्हाणांचे आरोप खोडून काढत त्यांच्यावर आरोपांची सरबत्ती केली.

'प्रवीण चव्हाण यांनी मला जामीन मिळवून दिल्यानंतर मी त्यांना जबाब लिहून देण्यास मदत करत होतो. गिरीश महाजन यांच्यासह अनेक महत्त्वाच्या प्रकरणात फिर्यादी व साक्षीदारांचे जबाब मी त्यांना लिहून दिले आहेत. प्रवीण चव्हाण माझ्या माध्यमातून पोलिस व फिर्यादींशी बोलायचे. पोलिसांच्या जेवणाचे बिलही मी 'यूपीआय' पेमेंटद्वारे दिले होते. मी त्यांना देव मानत होतो. परंतु, पोलिसांनी गिरीश महाजनांशी संबंधित भोईटे यांच्या घरी छापा टाकला तेव्हा माझा व्यवस्थापक पंच म्हणून नेण्यात आला. छाप्यादरम्यान बनावट पुरावे प्लांट केले गेले. तेव्हा माझ्या मनात शंकेची पाल चुकचुकली. या संदर्भातील सगळे पुरावे घेऊन मी माध्यमांसमोर येणार आहे,' असा दावाही तेजस मोरे यांनी केला.