म. टा. प्रतिनिधी, पुणे
मराठी चित्रपटांचे महत्त्वाचे केंद्र असले, तरी पुण्यात अखिल भारतीय मराठी चित्रपट महामंडळाचे कायमस्वरूपी कार्यालय नव्हते. पुण्यात हक्काचे आणि कायमस्वरूपी कार्यालय व्हावे, हे महामंडळाचे स्वप्न १० वर्षांनी पूर्ण झाले आहे. शहराच्या मध्यभागी महामंडळाचे सुसज्ज कार्यालय उभे राहिल्याने 'या जागेतून त्या जागेत' हा १० वर्षांचा वनवास संपला आहे. चित्रपट क्षेत्रात धडपडणाऱ्या तरुण कलाकारांसाठी या कार्यालयात चित्रीकरणाचा छोटासा संच उपलब्ध होणार आहे.
'शनिवार पेठेत साधना मीडिया सेंटरच्या शेजारील धवलगिरी अपार्टमेंटमध्ये दीड हजार चौरस फूट जागेत महामंडळाचे सुसज्ज कार्यालय आकारास आले आहे. राज्यातील नऊ कार्यालयांपैकी मुंबई, कोल्हापूर आणि आता पुणे ही तीन कार्यालये महामंडळाच्या मालकीची झाली आहेत. पुण्यातील सुसज्ज कार्यालयाचे उद्घाटन केंद्रीय माहिती व प्रसारण मंत्री प्रकाश जावडेकर यांच्या हस्ते १० ऑगस्ट रोजी सकाळी १० वाजता होणार आहे. महापौर मुक्ता टिळक, पालकमंत्री व महसूल मंत्री चंद्रकांत पाटील, सांस्कृतिक मंत्री विनोद तावडे आणि खासदार व अंदाज समितीचे अध्यक्ष गिरीश बापट या वेळी उपस्थित राहणार आहेत. या कार्यक्रमाला चित्रपट क्षेत्रातील अनेक कलाकार, तंत्रज्ञ, निर्माते उपस्थित राहणार आहेत,' असे महामंडळाचे अध्यक्ष मेघराज राजेभोसले यांनी मंगळवारी पत्रकारांना सांगितले.
'महामंडळाची स्थापना ९ नोव्हेंबर १९६५ रोजी झाली. पुणे शाखेला कार्यालय नसल्याने २००९ मध्ये सरपोतदार कुटुंबीयांचा विश्वास बंगला किंवा मनोरंजन संस्थेचे कार्यालय अशा ठिकाणांहून काम चालायचे. २०१३मध्ये एक कार्यालय बंद झाले. कार्यालय सुरू व्हावे, या मागणीसाठी कलाकारांनी मोर्चा काढला होता. पुणे कार्यालयाचे उत्पन्न दाखवा, मगच कार्यालय सुरू होईल, अशी अट होती. दरम्यानच्या काळात पुणे शाखेचे उत्पन्न वाढले. आमची कार्यकारिणी २०१६मध्ये निवडून आल्यानंतर टिळक रस्त्यावर कार्यालय सुरू झाले. तीन वर्षांनंतर आता महामंडळाचे स्वत:चे कार्यालय सुरू झाले असून, पुण्यातील १० वर्षांपासूनची मागणी पूर्ण झाली आहे,' याकडे राजेभोसले यांनी लक्ष वेधले.
चित्रपट महामंडळाला सरकारतर्फे अनुदान मिळत नाही. सभासदांचे शुल्क हाच आर्थिक स्रोत आहे. २०१६ पर्यंत विविध गटांतील एकूण २२ हजार सभासद होते. ही संख्या आता ४५ हजार झाली आहे. यामुळे महामंडळाचे उत्पन्न वाढले आहे; याशिवाय खर्च कमी केल्याने बचत झाली आहे. तीन कोटी रुपयांची एफडी १० कोटी रुपयांची झाली आहे. पुणे चित्रपट निर्मितीचे केंद्र झाल्याने उत्पन्न वाढले आहे.
- मेघराज राजेभोसले, अध्यक्ष, चित्रपट महामंडळ