म. टा. प्रतिनिधी, पुणे
रामवाडी ते वाघोली आणि रामवाडी ते विमानतळ या दोन्ही मार्गांवर मेट्रो प्रकल्प सुरू करण्यासाठी त्याचा डिटेल प्रोजेक्ट रिपोर्ट (डीपीआर) तयार करण्यास स्थायी समितीने मंगळवारी मान्यता दिली. स्थायी समितीचे अध्यक्ष योगेश मुळीक यांनी स्वत: दाखल केलेल्या प्रस्तावाला समितीने मंजुरी दिली असून तसा प्रस्ताव महामेट्रोला पाठविण्यात येणार आहे. दरम्यान, यापूर्वी स्वारगेट ते कात्रज आणि पिंपरी ते निगडी या मार्गांचाही 'डीपीआर' करण्याचे काम महामेट्रोने हाती घेतले आहे.
मेट्रोकडून वनाझ ते रामवाडी या मेट्रो मार्गाचे काम वेगाने सुरू आहे. रामवाडीपासून पुढे खराडी, वाघोलीपर्यंत मोठ्या प्रमाणात नागरीकरण झाले असल्याने मेट्रोमार्ग वाघोलीपर्यंत आणण्यात यावा, अशी मागणी स्थानिकांकडून करण्यात येत होती. त्याप्रमाणे लोहगाव विमानतळापर्यंत मेट्रो असावी, ही मागणीही जोर धरू लागली होती. या पार्श्वभूमीवर रामवाडी मेट्रोच्या मार्गात वाढ करण्याचा निर्णय स्थायी समितीने घेतला असून त्यासाठीचा डीपीआर तयार करण्याची सूचना महामेट्रोला करण्यात येणार आहे. महापालिकेकडून 'डीपीआर'चा खर्च करण्यात येतो. महामेट्रोकडून खर्चाबाबत माहिती पाठविण्यात आल्यानंतर त्यासाठी निधी उपलब्ध करण्यात येईल, असे मुळीक यांनी सांगितले.
नगर रस्त्यालगत वाढलेले नागरीकरण, 'आयटी'सह वेगवेगळ्या कंपन्या, येथे काम करणारे नागरिकांना या निर्णयामुळे दिलासा मिळाला आहे. तसेच, लोहगाव विमानतळावरून प्रवास करणाऱ्या प्रवाशांची संख्या मोठ्या प्रमाणात वाढली असून याठिकाणी पोहोचण्यासही नागरिकांना मोठ्या प्रमाणात वाहतूक कोंडीचा सामना करावा लागतो. रामवाडी मेट्रोमार्गाचा विस्तार झाल्यास नागरिकांची वाहतूक कोंडीतून सुटका होण्यास मदत होणार असल्याचे मुळीक म्हणाले.
नगर रस्त्यावरील वाहतूक कोंडी दिवसेंदिवस वाढत असून त्याला पर्याय म्हणून मेट्रो मार्ग हा वाघोलीपर्यंत नेण्यात यावी, अशी मागणी जोर धरू लागली आहे. महामेट्रोतर्फे गेल्या वर्षी मेट्रोबाबत सादरीकरण करण्यात आले होते. या वेळी राष्ट्रवादी काँग्रेसचे नगरसेवक सुनील टिंगरे यांनी मेट्रो मार्गाच्या विस्तारीकरणाचा प्रस्ताव देत रामवाडी ते वाघोली तसेच रामवाडी ते विमानतळ या मेट्रो मार्गांची मागणी केली होती. स्थायी समितीने या प्रस्तावाला मंजुरी दिल्याने स्थायी समितीचे अध्यक्ष तसेच समितीचे अभिनंदन करत असल्याची प्रतिक्रिया टिंगरे यांनी व्यक्त केली.
...............