नांदेडमध्ये २० जुलैपासून आषाढी महोत्सव
नांदेड - शिवसेनेचे पक्षप्रमुख उद्धव ठाकरे यांच्या वाढदिवसानिमित्त दरवर्षीप्रमाणे यंदाही आषाढी महोत्सवाचे आयोजन करण्यात आले आहे. आमदार हेमंत पाटील यांच्या पुढाकारातून गेल्या अनेक वर्षांपासून हा महोत्सव साजरा केला जातो.
२० ते २३ जुलै या कालावधीत होणाऱ्या या महोत्सवात ख्यातकीर्त गायक अनुप जलोटा यांच्या भजन-संध्या गायनाचा कार्यक्रम होणार आहे. २१ रोजी गायक सुरेश शुक्ल यांच्या मधुर स्वरांगणाचा कार्यक्रम आयोजित करण्यात आला आहे. २२ रोजी दिवाकर चौधरी व देवमुद्रा मुव्हमेंट स्कूल प्रस्तुत विठ्ठल तुकयाचा नृत्य आविष्काराचा कार्यक्रम होणार आहे. २३ रोजी ख्यातनाम गायक अवधूत गुप्ते यांच्या संगीत रजनी गायनाचा कार्यक्रम होणार आहे. शंकरराव चव्हाण सभागृहात सायंकाळी ६ ते १० या वेळात होणाऱ्या कार्यक्रमाला उपस्थित राहावे, असे आवाहन संयोजक आमदार हेमंत पाटील यांनी केले आहे.