म. टा. प्रतिनिधी, पिंपरी
पती आजारी पडल्याने माहेरहून तातडीने सासरी आलेल्या गर्भवती पत्नीच्या मानेवर कुऱ्हाडीचा घाव घालून पतीने पत्नीचा खून केला. त्यानंतर पतीने स्वतःच्या गळ्यावर वार करून आत्महत्येचा प्रयत्न केला. फुगेवाडी येथे रविवारी (२५ ऑगस्ट) ही घटना घडली. आपल्या अडीच आणि साडेतीन वर्षांच्या चिमुरड्यांसमोरच पतीने पत्नीचा खून केल्याने एकच खळबळ उडाली आहे.
भोसरी पोलिस ठाण्याचे पोलिस निरीक्षक (गुन्हे) देवेंद्र चव्हाण यांनी दिलेल्या माहितीनुसार, पूजा प्रवीण घेवंदे (वय २५) असे खून झालेल्या गर्भवतीचे नाव आहे. प्रवीण ऊर्फ गोपाल घेवंदे (वय २८) असे जखमी झालेल्या पतीचे नाव आहे. घेवंदे दाम्पत्य मेहकर, बुलडाणा येथील आहे. सात ते आठ महिन्यांपूर्वी कामानिमित्त ते पुण्यात आले होते. पिंपरी-चिंचवडमधील फुगेवाडी येथे एका झोपडीत आपल्या दोन मुलांसह ते राहत होते. यातील एक मुलगा साडेतीन वर्षांचा; तर दुसरा दोन वर्षांचा आहे. घेवंदे बिगारी काम करीत होते.
गर्भवती असलेली पूजा घेवंदे औरंगाबाद येथे आईकडे गेली होती. मात्र, पती प्रवीण आजारी असल्याने ती रविवारी (दि. २५) फुगेवाडी येथे आली होती. सायंकाळी पाचच्या सुमारास पूजा घरात असताना त्याने पूजाच्या मानेवर धारदार शस्त्राने घाव घालून खून केला. त्यानंतर स्वत:च्या गळ्यावर वार करून आत्महत्या करण्याचा प्रयत्न केला. यात तो गंभीर जखमी झाला. या वेळी घरात असलेल्या त्यांच्या दोन्ही लहान मुलांनी ही बाब घराबाहेर इतरांना सांगितली. पूजाला पिंपरीतील यशवंतराव चव्हाण स्मृती रुग्णालयात दाखल करण्यात आले. डॉक्टरांनी तिला मृत घोषित केले. तसेच जखमी प्रवीण याला उपचारासाठी पुणे येथील ससून सर्वोपचार रुग्णालयात दाखल करण्यात आले आहे. दरम्यान, गेल्या काही दिवसांपासून प्रवीण घेवंदे हा मानसिक रुग्ण असल्यासारखा वागत आहे; तसेच तो आजारी असल्याचे त्याचे कुटुंबीय सांगत आहेत. या प्रकरणी भोसरी पोलिस तपास करीत आहेत.