म. टा. प्रतिनिधी, पिंपरी
मालकाच्या परवानगी, सह्यांशिवाय त्याचे वाहन परस्पर दुसऱ्याच्या नावे करण्याचा पराक्रम पिंपरी चिंचवड उपप्रादेशिक परिवहन कार्यालयाने (आरटीओ) केला होता. मात्र, संबंधित वाहनमालकामुळे 'आरटीओ'तील संबंधित अधिकाऱ्यांना हा गैरप्रकार पचवता आला नाही. वाहन मालकाने आठ महिने लढा देऊन हा प्रकार उघडकीस आणून माध्यमांद्वारे तो जनतेसमोरही आणला. याचा राग आल्याने आरटीओ अधिकारी आणि कर्मचाऱ्यांनी मूळ वाहनमालकाला वाहन ताब्यात देण्यास टाळाटाळ चालविली आहे. अधिकाऱ्यांनी संबंधित वाहन अद्यापही मूळ मालकाच्या ताब्यात दिलेले नाही. उलट या वाहनावर अनेक प्रकारचे कर लादून संबंधित वाहन मालकाला एखाद्या गुन्ह्यात अडकविण्याचा प्रयत्न आरटीओ करीत आहे.
सचिन काशिनाथ गव्हाणे या टेम्पो मालकाला गेल्या काही महिन्यांपासून आरटीओला जेरीस आणले आहे. गव्हाणे आपल्या अंध पत्नी आणि छोट्या मुलीसोबत राजगुरुनगर येथे राहतात. त्यांच्या मालकीचा टेम्पो त्यांनी त्यांच्या छोटा भाऊ समीर गव्हाणे याला भाड्याने चालवायला दिला होता. २०१४ पर्यंत त्यांचा भाऊ त्यांना टेम्पोचे भाडे म्हणून काही रक्कम देत होता. मात्र, २०१४ नंतर त्याने पैसे देणे बंद केले. त्यानंतर गेली चार वर्षे त्यांनी सातत्याने समीर गव्हाणे यांच्याकडे पैशांची मागणी केली. समीर याने पैसे देण्यास नकार दिल्याने सचिन यांनी खेड पोलिस ठाण्यात धाव घेतली. त्या वेळी त्यांना आपल्या नावावरील टेम्पो परस्पर विकला गेल्याची माहिती समजली. त्यामुळे या संदर्भातील माहिती घेण्यासाठी पिंपरी-चिंचवडच्या आरटीओ कार्यालयात गेले. तेथे त्यांनी माहितीच्या अधिकाराखाली आपल्या वाहनाची सर्व कागदपत्रे तसेच विक्री संदर्भातील माहिती मागविली. त्यात त्यांना 'आरटीओ'च्या संबंधित लिपिकाने काही अधिकाऱ्यांच्या मदतीने मूळ मालकाची कागदपत्रे न घेता त्याच्या भावाच्या कागदपत्रांच्या आधारे वाहन हस्तांतरणाचा प्रकार केल्याचे उघडकीस आले. हा प्रकार सचिन यांच्या लक्षात आल्यानंतर त्यांनी याचा पाठपुरावा केला. सर्व पुरावे गोळा करून माध्यमांद्वारे हा प्रकार उघडकीस आणला. 'आरटीओ'चा गैरकारभार उघडकीस आल्यानंतर 'आरटीओ'च्या अधिकाऱ्यांनी मूळ मालकाच्या भावाने चुकीची कागपत्रे देऊन हा प्रकार केला असावा, असे स्पष्ट केले. या प्रकाराचा तपास करून संबंधितांवर कारवाई करण्याचे आश्वासन आरटीओ अधिकाऱ्यांनी दिले होते. या प्रकरणाला आठ महिने उलटून गेल्यानंतर गुन्हेगारांवर कारवाई करण्यात आली नाही. या उलट वाहनाच्या मूळ मालकालाच आरोपीच्या पिंजऱ्यात उभे करण्याचा प्रयत्न आरटीओ करीत आहे.
.
गेल्या वर्षी माझ्या मालकीच्या टेम्पो परस्पर दोन जणांना विकला गेला. वर्षभरात दोन मालक झाले, तेव्हा टॅक्स रखडल्याचे 'आरटीओ'च्या लक्षात आले नाही. टेम्पो मूळ मालकाच्या नावावर कराव्या लागतील, हे स्पष्ट झाल्यानंतर टेम्पोचा टॅक्स रखडल्याचे सांगितले जात आहे. 'आरटीओ'ने काही दिवसांपूर्वी टॅक्स रखडल्याची नोटीस पाठविली. टॅक्स न भरल्यास टेम्पो जप्त करून गुन्हा दाखल करण्याचा इशारा दिला. हे सर्व माझ्यावर दबाव आणण्यासाठी आणि त्रास देण्यासाठी केले जात आहे. खोटा गुन्हा दाखल करण्यासाठी हा प्रकार सुरू आहे.
सचिन गव्हाणे, वाहनमालक
.
ऑनलाइन सिस्टिमचा गैरवापर
'आरटीओ कार्यालयातील काही कर्मचारी अधिकाऱ्यांच्या मदतीने ऑनलाइन यंत्रणेचा गैरवापर करीत आहे. सर्व गोष्टी ऑनलाइन झाल्या आहेत, तर मग परस्पर वाहनविक्री होतेच कशी, मालकाच्या नोंदविलेल्या मोबाइल क्रमांकाशिवाय ऑनलाइन अर्ज भरला जातो कसा, याचा शोध घ्यायला हवा. आरटीओचे कर्मचारी ऑनलाइन यंत्रणेत हस्तक्षेप करू शकतात,' असा आरोप सचिन गव्हाणे यांनी केला.
--------
गुन्हा नोंदविण्यात पोलिसांची चालढकल
वाहन परस्पर दुसऱ्याच्या नावावर केले गेले असून, माझ्या वाहनावर दुसऱ्याने ताबा घेतला आहे, अशी तक्रार करण्यासाठी सचिन गव्हाणे भोसरी एमआयडीसी पोलिस ठाण्यात गेले. मात्र, हा कौटुंबिक वाद आहे, असे सांगून पोलिसांनी त्यांची तक्रार घेतली नाही. त्यानंतर अनेक वेळा सचिन यांनी पोलिस ठाण्यात हेलपोटे घातले. मात्र, गुन्हा नोंदविण्यात आला नाही. त्यामुळे गव्हाणे यांनी आता पोलिस आयुक्तांकडे धाव घेतली आहे.