बेपत्ता इंजिनीअरचा मृतदेह सापडला

म. टा. प्रतिनिधी, पुणे

दहा दिवसांपासून बेपत्ता झालेल्या तरुणाचा धायरीतील रायकरमळा येथील डोंगरात सडलेल्या अवस्थेत त्याचा मृतदेह रविवारी दुपारी आढळून आला. मृत तरुण इंजिनीअरिंगमध्ये एका विषयात नापास झाल्यामुळे त्याने डोंगरावर जाऊन उडी मारून आत्महत्या केल्याचा संशय पोलिसांकडून व्यक्त केला जात आहे. या प्रकरणी सिंहगड रस्ता पोलिस ठाण्यात नोंद करण्यात आली आहे.

शुभम भोसले (वय २१) असे मृतावस्थेत आढळलेल्या तरुणाचे नाव आहे. पोलिसांनी दिलेल्या माहितीनुसार, शुभम हा धायरी येथे रायकर मळ्यातील जाधव वस्ती येथे राहायला होता. शुभम भोसलेचे वडील सुरक्षारक्षक म्हणून काम करतात. तो सिंहगड इन्स्टिट्यूटला इंजिनीअरिंगच्या शेवटच्या वर्षात शिकत होता. तो एका विषयात नापास झाल्याने सुरक्षारक्षक म्हणून वडिलांसोबत काम करण्यासाठी जात होता. तीन डिसेंबर रोजी तो इंजिनीअरिंगचा पेपर देण्यासाठी जात असल्याचे सांगून घरातून गेला होता. त्यानंतर तो घरी परत आला नाही. त्याच्या पालकांनी चार डिसेंबरला सिंहगड रोड पोलिस ठाण्यात मिसिंगची तक्रार दाखल केली होती.

रविवारी दुपारी धायरीतील काही तरुण फोटोग्राफी करण्यासाठी धायरीतील डोंगरांवर गेले होते. त्यावेळी त्यांना तेथे दुर्गंधी आल्यामुळे त्यांनी नेमका कशाचा वास येतोय हे पाहिले. त्या वेळी त्यांना कुजलेला मृतदेह आढळून आला. त्यांनी तत्काळ पोलिसांना त्याची माहिती दिली. त्यानंतर सिंहगड रोड पोलिसांनी घटनास्थळी धाव घेतली असता त्यांना शुभमचा मृतदेह आढळून आला. पोलिस तपासात शुभमने डोंगराच्या कड्यावरून सुमारे दोनशे फुटावरून उडी मारून आत्महत्या केली असावी, अशी माहिती समोर आली आहे. ही आत्महत्या पाच-सहा दिवसांपूर्वी केल्याने मृतदेह कुजलेला होता. शुभमचा इंजिनीअरिंगमध्ये एका विषयात नापास झाला होता. त्यामुळे काही दिवसांपासून वडिलांसोबत सुरक्षारक्षक म्हणून काम करत होता. त्या वेळी त्याचे काही मित्र 'तू इंजिनीअर असून देखील वॉचमन म्हणून काम करतो,' म्हणून त्याला चिडवत होते. त्यामुळे तो नैराश्येत होता, अशी माहिती चौकशीत समोर आली आहे. यातून शुभमने नैराश्यातून आत्महत्या केल्याचा संशय पोलिसांनी व्यक्त केला आहे.