म. टा. प्रतिनिधी, येरवडा
विश्रांतवाडी येथील विद्यानगर परिसरात करोना पॉझिटिव्ह वृद्ध दाम्पत्याच्या संपर्कात आलेली त्यांची तीन मुले आणि इतर तीन नागरिक यांचा करोना चाचणी अहवाल निगेटिव्ह आला आहे. विद्यानगर परिसरात प्रथमच करोनाचा रुग्ण आढळल्याने खबरदारीचा उपाय म्हणून १५ ते १७ मे या दरम्यान येथे कडकडीत बंद पाळण्यात येत आहे.
येरवडा क्षेत्रीय कार्यालयांतर्गत येणाऱ्या प्रभाग दोन, फुलेनगर, नागपूर चाळमधील विद्यानगर परिसरात दोन दिवसांपूर्वी एक वृद्ध दाम्पत्य करोना पॉझिटिव्ह आढळून आले. त्यांच्यावर सध्या खासगी रुग्णालयात उपचार सुरू आहेत. आरोग्य विभागाकडून रुग्णांची मुले आणि मुलीची चाचणी केली असता सर्व जण निगेटिव्ह आढळून आले. यानंतर पालिकेतर्फे सोसायटी आणि परिसराचे निर्जंतुकीकरण करण्यात आले. वृद्ध दाम्पत्य सोसायटीतील काही रहिवाशी आणि दोन दुकानदारांच्या संपर्कात आल्याचे समजल्याने या सर्वांचे 'स्वॅब' तपासणीसाठी पाठविण्यात आले होते. यापैकी तीन जणांचे अहवाल निगेटिव्ह आले आहेत. उर्वरित अहवाल अजून आलेले नाहीत. खबरदारीचा उपाय म्हणून संपूर्ण विद्यानगर परिसरातील दुकाने आणि भाजीपाला विक्री तीन दिवस बंद करण्यात आल्याचे सामाजिक कार्यकर्ते सुहास टिंगरे यांनी सांगितले.
.
सफाई कामगाराच्या कुटुंबाला करोना
धानोरी येथील चौधरीनगरमध्ये महापालिकेत सफाई कामगार असलेल्याला करोनाची लागण झाली आहे. कामगाराची पत्नी आणि मुलीला करोनाची लागण झाल्याचे निदान झाले असून, त्यांना रुग्णालयात दाखल करण्यात आले आहे. काही दिवसांपूर्वी चौधरीनगरमध्ये एका कुटुंबाला करोनाची लागण झाली होती. आतापर्यंत येथे एकूण सहा रुग्ण करोना पॉझिटिव्ह आढळले आहेत. प्रशासनाने सर्व परिसर सील केला आहे.