महिला संख्या कमी झाल्याने पुरुषांना बसण्याचे डेपो प्रशासनाचे आदेश
म. टा. प्रतिनिधी, पुणे
पुणे महानगर परिवहन महामंडळाने (पीएमपी) खास महिला प्रवाशांसाठी सुरू केलेल्या तेजस्विनी बसमध्ये सर्रासपणे पुरुष प्रवासी प्रवास करीत असल्यामुळे महिलांची अडचण होऊ लागली आहे. याबाबत महिला प्रवाशांना विचारले असता, त्यांनी सांगितले, की डेपो मॅनेजरने महिला प्रवाशांची संख्या कमी असल्याने फेऱ्या फुकट जातात, उत्पन्न कमी होत असल्याने पुरुषांनाही बसमध्ये बसण्याचे आदेश दिले आहेत. त्यामुळे पीएमपीला महिला प्रवाशांपेक्षा उत्पन्न महत्त्वाचे असल्याची टीका महिला प्रवाशांनी केली.
पुणे आणि पिंपरी-चिंचवड शहरातील सुमारे दहा ते अकरा लाख नागरिक दररोज पीएमपीने प्रवास करतात. यामध्ये महिला प्रवाशांची संख्या तब्बल साडेतीन ते चार लाख आहेत. शालेय, महाविद्यालयीन मुली, नोकरदार, व्यावसायिक महिलांबरोबरच ज्येष्ठ महिलाही प्रवासासाठी पीएमपीला प्राधान्य देतात. या महिलांना सुरक्षित व आरामदायी प्रवासीसेवा मिळावी, यासाठी पीएमपी प्रशासनाने खास महिलांसाठी ४१ तेजस्विनी बस सुरू केल्या. या बसमध्ये महिला वाहकांची नेमणूक केली. बसच्या माध्यमातून पुणे व पिंपरी-चिंचवड शहरातील १६ मार्गांवर दररोज ५१२ फेऱ्या मारल्या जातात. महिलांकडूनही तेजस्विनी बसला चांगला प्रतिसाद मिळत होता. मात्र, गेल्या काही दिवसांपासून तेजस्विनी बसमध्ये पुरुष प्रवाशांना प्रवेश दिला जात आहे. त्यामुळे तेजस्विनी बसमध्येही महिलांना बसायला जागा मिळत नसल्याचे चित्र पाहायला मिळत आहे. याबाबत महिला प्रवाशांनी तेजस्विनी बसमध्ये पुरुष प्रवाशांना कसे बसू देता, असे विचारले असता, 'महिला प्रवाशांची संख्या कमी असल्याने तेजस्विनी बसच्या अनेक फेऱ्या फुकट जातात. त्यामुळे उत्पन्न कमी होत आहे, असे डेपो मॅनेजरने सर्व प्रवाशांना बसमध्ये बसू देण्याच्या सूचना केल्या आहेत,' असे उत्तर देण्यात आले. त्यामुळे पीएमपी प्रशासनाला महिला प्रवाशांच्या सुरक्षिततेपेक्षा उत्पन्न महत्त्वाची असल्याची टीका महिला प्रवाशांनी केली.
खास महिलांसाठी सुरू करण्यात आलेल्या तेजस्विनी बसमध्ये पुरुष प्रवासीही प्रवास करत असल्याची बाब काही दिवसांपूर्वी निदर्शनात आली. याबाबत विचारले असता, उत्पन्न कमी मिळत असल्याने सर्व प्रवाशांना बसमध्ये बसू देण्याच्या सूचना असल्याचे वाहकाने सांगितले. या सर्व प्रकाराची तक्रार पीएमपी प्रशासनाकडे केली; मात्र त्यावर कोणतेही उत्तर मिळाले नाही. त्यामुळे पीएमपी प्रशासनाला महिलांबद्दल किती आपुलकी आहे, हे लक्षात येते.
- आशा शिंदे, पीएमपी प्रवासी
पीएमपी प्रवासी - १० ते ११ लाख
महिला प्रवासी - सुमारे ४ लाख
तेजस्विनी बस - ४१
तेजस्विनी बसचे मार्ग - १६
फेऱ्या - ५१२