म. टा. प्रतिनिधी, पुणे
'महाराष्ट्र कॉस्मोपोलिटन एज्युकेशन सोसायटी'च्या 'पै कॉलेज ऑफ व्हिज्युअल इफेक्ट्स, डिझाइन अँड आर्ट्स' आयोजित 'पै आयटी ऑलिंपियाड'चा पारितोषिक वितरण समारंभ गुरुवारी उत्साहात पार पडला. या ऑलिंपियाडमधील चार विजेत्यांना आझम कॅम्पसमधील समारंभाला हेलिकॉप्टरने येण्याचा मान मिळाला.
प्रमुख पाहुणे म्हणून बहुराष्ट्रीय कंपनीचे अधिकारी राहुल बक्षी म्हणून उपस्थित होते. सोसायटीचे अध्यक्ष डॉ. पी. ए इनामदार अध्यक्षस्थानी होते. प्राचार्य डॉ. ऋषी आचार्य यांनी स्वागत केले. या स्पर्धेत ७ राज्यांतील २७० शाळा आणि कनिष्ठ महाविद्यालयांतील १५ हजार विद्यार्थी सहभागी झाले होते. स्पर्धेचे हे नववे वर्ष होते. विजेत्यांना लॅपटॉप, आयपॅड, टॅब आणि प्रमाणपत्रे देण्यात आली. वेगवेगळ्या गटात रुमाना पानसरे, अरिशा शेख, मरियम शेख, अब्दूस खान यांनी प्रथम पारितोषिक पटकावून हेलिकॉप्टरने आझम कॅम्पसच्या मैदानावर येण्याचा मान मिळाला. 'पै आयसीटी अॅकॅडमी'च्या संचालक मुमताझ सय्यद यांना जीवनगौरव पुरस्काराने गौरविण्यात आले.
'कॅम्पसमध्ये लहान विद्यार्थी कम्प्युटर तयार करतात. मोबाइल, आयपॅड दुरुस्त करतात, हे पाहून मी थक्क झालो. लहानपणापासून उद्योजकतेची बीजे रुजवण्याचा ध्यास महत्वाचा आहे. अनेक मोठ्या शैक्षणिक संस्था या विषयात काम करीत नाहीत. येथून शिकलेले विद्यार्थी गेमिंग, अॅनिमेशन इंडस्ट्रीला मोठे योगदान देतील याची खात्री वाटते,' असे बक्षी यांनी सांगितले. या वेळी माहिती तंत्रज्ञान क्षेत्रातील तज्ज्ञ अमित गाला, हर्षद सांगळे, सोसायटीच्या उपाध्यक्ष आबेदा इनामदार, सचिव लतीफ मगदूम, सहसचिव इरफान शेख, ऋषी आचार्य, मुमताझ सय्यद, स्वतंत्र जैन, ताहिर खान, पूजा जाधव उपस्थित होते.