म. टा. प्रतिनिधी, पुणे
पुणे महापालिकेच्या हद्दीतील मिळकतकरधारकांना नव्या आर्थिक वर्षाची (२०२०-२१) बिले पोस्टाने पाठविण्यात येणार असून, त्यासाठी ३६ लाख रुपये खर्च येणार आहे. शहरासह नव्याने समाविष्ट गावांतील तब्बल ११ लाख मिळकतींना ही बिले पाठविण्यात येणार आहेत.
गेल्या काही वर्षांपासून पालिकेतर्फे सर्व मिळकतकर धारकांना पोस्टामार्फत मिळकतींची बिले पाठविण्यात येतात. त्यासाठी प्रति बिल तीन रुपये २० पैसे खर्च येणार असून, यासंबंधीच्या प्रस्तावाला स्थायी समितीने नुकतीच मंजुरी दिली आहे. महापालिकेच्या हद्दीत सुमारे साडेनऊ लाख मिळकतकरधारक असून, नव्याने समाविष्ट झालेल्या ११ गावांमधील मिळकतींची संख्या दीड लाखांच्या जवळपास आहे. या सर्व मिळकतींना नव्या आर्थिक वर्षात कराची बिले पाठविण्यात येतात. सुरुवातीच्या दोन महिन्यांत संपूर्ण वर्षाचा कर भरणाऱ्या नागरिकांना ५ ते १० टक्के सवलत देण्यात येत असल्याने मार्च अखेरपासूनच बिले पाठविण्यास सुरुवात होते. त्यासाठीचा पोस्ट खात्याने निश्चित केलेल्या दरांना नुकतीच मान्यता देण्यात आली आहे.
मिळकतकर वेळेत भरण्याबाबत नागरिकांमध्ये जनजागृती करण्यासाठी; तसेच आकाशचिन्ह व परवाना विभागातर्फे दिशादर्शक कमानींवर जाहिरातींसह पोस्टर्स, बॅनर्स, फ्लेक्स लावण्यासाठी मान्यता देण्यात आल्याची माहिती स्थायी समितीचे अध्यक्ष हेमंत रासने यांनी दिली. रेडिओ, चित्रपटगृहे आणि सोशल मीडियाद्वारे दृक-श्राव्य जाहिराती करून घेण्यासही मान्यता देण्यात आली आहे.