म. टा. प्रतिनिधी, पुणे
कुख्यात गुंड बापू नायरचा जवळचा साथीदार नीलेश बसवंत याला अटक करण्यात गुन्हे शाखेच्या पोलिसांना यश आले आहे. त्याला खडकीतून अटक करून त्याच्याकडून एक पिस्तूल आणि काडतुसे जप्त केली आहेत.
नीलेश श्रीनिवास बसवंत (वय २६, रा. अप्पर इंदिरानगर, बिबवेवाडी) असे अटक करण्यात आलेल्याचे नाव आहे. कोंढवा पोलिस ठाण्यात कुख्यात बापू नायर आणि त्याच्या टोळीतील गुन्हेगारांवर खुनाचा प्रयत्न केल्याचा २०१५ मध्ये गुन्हा दाखल होता. या प्रकरणी पोलिसांनी नायर टोळीवर महाराष्ट्र संघटित गुन्हेगारी प्रतिबंधक कायद्याची (मोक्का) कारवाई केली आहे. नायर टोळीवर मोक्का लावल्यानंतर बापू नायर हा पुण्यातून गायब झाला होता. तो पोलिसांपासून वाचण्यासाठी देशभर सतत ठिकाणे बदलत फिरत होता. अखेर, त्याला दिल्ली येथून अटक करण्यात आली होती. मात्र, नायरचा मुख्य साथीदार नीलेश बसवंत पोलिसांच्या हाताला लागत नव्हता. गेल्या दीड वर्षांपासून पोलिसांना गुंगारा देणारा नीलेश बसवंत हा खडकी येथे आल्याची माहिती गुन्हे शाखेच्या युनिट तीनचे कर्मचारी संदीप तळेकर यांना मिळाली. त्यानुसार पोलिस उपायुक्त शिरीष सरदेशपांडे यांच्या मार्गदर्शनाखाली निरीक्षक दिनकर मोहिते, शिवानंद स्वामी, कल्पेश बनसोडे, सुजित पवार यांच्या पथकाने खडकी परिसरात सापळा रचून त्याला ताब्यात घेण्यात आले. त्याच्याकडून एक पिस्तुल, दोन काडतुसे, आठ हँडसेट आणि ११ सिमकार्ड जप्त केले आहेत. त्याच्याशी संबंधित लोकांशी संपर्कात राहण्यासाठी तो आठ मोबाइल हँडसेट, अनेक सिमकार्ड वापरत असल्याचे समोर आले आहे, अशी माहिती गुन्हे शाखेचे सहायक पोलिस आयुक्त समीर शेख यांनी दिली.